Te Aroaro ae Rangi ni Kakawaki Ibukin te Tia Reirei ae Mwaatai
1. Tera te aroaro ae rangi ni kakawaki ibukin te tia reirei ae mwaatai?
1 Tera te bwai ae kona ni buokaki iai temanna n riki bwa te tia reirei n te Baibara ae mwaatai? Te reirei ae rietata? Te bwai ae e a tia n rinanona? Oin ana konabwai? Ni koauana, bon te aroaro ae titeboo ma kakoroan nanon te Tua are a kanikinaeaki iai taan rimwin Iesu, ao anne bon aroaron Iehova ae rangi n ataaki, e anainano ao n rangi ni kakawaki. (Ioa. 13:35; IKar. 5:14; 1 Ioa. 4:8) Bon te tangira. A kaotiota te tangira taan reirei aika mwaatai.
2. Bukin tera ngkai e kakawaki bwa ti na tangiriia aomata?
2 Tangiraia Aomata: E kaotiota tangiraia aomata te Tia Reirei ae Kakannato ae Iesu, ao aei are e a kaungaaki iai nanoia aomata bwa a na ongora irouna. (Ruka 5:12, 13; Ioa. 13:1; 15:13) Ti na uarongorongo n taai aika angaraoi ngkana ti tabeakinia aomata. A na aki bwara nanora n aanga n totoko n aron te bwainikirinaki ao te aki kani bwerengaki. Ti na kaotiota tabeakinaia ma nanora ni koaua te koraki ake ti uarongorongo nakoia, ao ti na bitii ara aanga ni maroro ni kaineti ma baika a kan ongora riki iai. Ti riai ni karekea ara tai ni maroro ao ni buokiia aomata ake ti reirei ma ngaiia n te Baibara, imwain waakinan ara reirei ma ngaiia.
3. Ti na kanga ni buokaki n te mwakuri ni minita ngkana ti tangiri koaua aika n te Baibara?
3 Tangiri Koaua Aika n te Baibara: E tangiri naba koaua aika n te Baibara Iesu ao e iangoi n ai aroni bwaai aika kakawaki. (Mat. 13:52) Ti na taetae ma te ingaingannano ae bati ngkana ti tangira te koaua, ao aei ae kona ni kauekea te ungannano irouia ake a ongora iroura. E na buokira te tangira anne ni kaatuui ara iango i aon te rongorongo ae manena ae ti tataekinna, ao e kona ni kerikaaki iai maakura n te mwakuri ni minita n oneani mwin are ti na raraoma ibukini kabwakara.
4. Ti na kanga ni karikirakea te tangira?
4 Karikirakea te Tangira: Ti na kanga ni karikirakea tangiraia aomata? Ngkana ti kaotiota te tangira are a a tia ni kaotiotia Iehova ma Natina, nakoia aomata n ara aono aika akea otaia ae koaua ibukin te Atua ao ana kantaninga. (Mareko 6:34; 1 Ioa. 4:10, 11) E na korakora riki tangirani koaua aika n te Baibara iroura rinanon ara katoatai n ukeuke i bon iroura ao kananoan ara iango. Te tangira bon uaan te taamnei. (IKar. 5:22) Mangaia are ti kona ni butiia Iehova taamneina ae raoiroi, ao buokara bwa ti na karikirakea te tangira. (Ruka 11:13; 1 Ioa. 5:14) N aki ongea ara reirei ae rietata, maanra n te onimaki, ke oin ara konabwai, ma ti boni kona n riki bwa te tia reirei n te Baibara ae mwaatai ngkana ti kaotiota te tangira.