Buoka Kaain te Auti Bwa E na Bwaina te Iangoraoi n te Baere Maroroakinaki
1. Tera te anga ae na uaana riki n te mwakuri ni minita?
1 Tera te anga ae na uaana riki n te mwakuri ni minita, ti na imanonoa kaain te auti bwa e na kakoauaa te baere ti taekinna ke ti na buoka kaain te auti bwa e na bwaina te iangoraoi ao e na reke otana ae eti? E bwaina te iangoraoi te abotoro Bauro ngke e maroro ma I-Iutaia i Tetaronike, ao “n tokina, tabeman mai buakoia a a riki bwa taan onimaki.” (Mwa. 17:2-4) Tera ae irekereke ma bwainan te iangoraoi n te baere ti maroroakinna ma tabeman?
2. Ti na kanga ni kakairi n ana katoto Bauro ngkana ti tataekina te rongorongo ae raoiroi?
2 Tabeakina Aia Namakin ao Aroaroia Aomata: Ti na buokaki bwa ti na bwaina te iangoraoi ni maroro ma aomata n ara aono, ngkana ti atai aia koaua ao aia namakin. E moana ana maroro Bauro nakoia kaaini Kuriiti n te Areiobako n taekini baike a tia n atai ao ni kakoauai. (Mwa. 17:22-31) Mangaia are ngkana ko katauraoa am maroro, iaiangoa riki aia koaua ma baike a kakoauai aomata ake n am aono. (1Kor. 9:19-22) Ngkana e kauekea te kauntaeka kaain te auti, kataia ni kakaaei baika kam nanoteuana iai, ao kabotoa am maroro iai.
3. Ti na kanga ni bwaina te iangoraoi n te aro ae uaana n te baere ti maroroakinna ma tabeman, n arora ni kabonganai titiraki ma te wanawana?
3 Wanawana ni Kabonganai Titiraki: Ti aki kona ni kaota te kawai ae na buokaki iai te tia mwamwananga, ngkana ti aki ataa te tabo ae mena iai. N aron naba anne, ti aki kona ni buoka kaain te auti bwa e na mataata, ngkana ti aki ataa ana koaua. Imwain ana maroro Iesu ma taan ongora ao e aki toki n tititirakinia, bwa e aonga n atai aia iango. N te katoto, ngke e titirakinaki Iesu iroun temanna ni kangai, “tera ae I riai ni karaoia bwa e aonga n reke irou te maiu are aki toki?,” e ukera moa ana iango te aomata anne Iesu imwain ae e kaekaa. (Ruka 10:25-28) N te tai teuana ngke e anga te kaeka ae kairua Betero, e wanawana Iesu ni kabonganai titiraki ni kaeta ana iango. (Mat. 17:24-26) Mangaia are ngkana e titiraki ke e kaota ana iango ae akea koauana kaain te auti, ti kona ni kabonganai titiraki ni buokia bwa e na iangoa raoi te baere ti maroroakinna.
4. Bukin tera bwa ti riai ni buoka kaain te auti bwa e na bwaina te iangoraoi n te baere maroroakinaki?
4 Ngkana ti buoka kaain te auti bwa e na bwaina te iangoraoi n te baere maroroakinaki, ti kakairi iroun te Tia Reirei ae Kakannato ae Iesu, n ikotaki naba ma taan uarongorongo n te moan tienture ake a bwaina te wanawana. Ti kaotiota tabeakinan te aomata anne, ao mwamwannanoana. (1Bet. 3:15) N tokina, e na kukurei ni kani manga okiraki.