Kakabwaia Aika Reke ni Karaoan Aono Aika Aki Bati ni Mwamwakuriaki
1. Tera aron Iesu ngke e noriia aomata ake e kaitiboo ma ngaiia n ana mwakuri ni minita?
1 Tera ana namakin Iesu irouia aomata ake e kaitiboo ma ngaiia n ana mwakuri ni minita? “Ngke e noriia te koraki ae bati ao e nanoangaiia ibukina bwa a karawawataaki ma ni kananoanga, ao a kamaenakoaki n aroia tiibu aika akea te tia kawakinia.” (Mat. 9:35, 36) Ngke e noria Iesu bwa e a moanna ni mamaara aia onimaki aomata, ao e a kairaki bwa e na tuangia ana abotoro ni kangai, “E a rangi ni mwaiti te uaa ae riai n taiaki ngkai, ma a karako taani mwakuri. Mangaia ae butiia Mataniwin te tai bwa e na kanakoia taani mwakuri nakon taiakin ana uaa.” Ngkana ko karaoa te mwakuri ni minita, ko namakina naba are e namakinna Iesu?
2. Tera te kawai ibukini karaoan aono aika aki bati ni mwamwakuriaki?
2 Te Bubutii Ibukin Aono Ake A na Mwakuriaki: E iaiangoa raababan te aono Iesu are e tangiria ni karaoia. (Ruka 4:43) Ti na kanga ni kakairi n ana iango ibukin ana aono? Ti kona ni butiia unimwaane aia kariaia bwa ti na karaoi aono aika aki bati ni mwamwakuriaki. Ngkana ti karekea aia kariaia unimwaane ao n ongeaba n aia kairiri, ti kaota iai karinean ana babaire te Atua ao ti na boni kakabwaiaaki iai.—1Kor. 14:33, 40.
3. Baikara kakabwaia ake a rinanona te koraki ake a karaoa te mwakuri aei?
3 Kakabwaia Aika Ti Kona ni Karekei: Ngkana a anga nanoia taari mwaane bwa a na karaoi aono aika aki bati ni mwamwakuriaki, baikara kakabwaia ake a karekei? E korea ae kangai te tari te mwaane temanna: “Ngke I moan tuangaki bwa N na kairiia kaain au kurubu nakon te aono are aki bati ni mwamwakuriaki, ao e bon tei nangina irou. Ma I a manga butimwaea te mwioko anne. I aki roko n te uringaaba ibukini butimwaean te mwioko anne ma e boni bita maiu. I karabwaa Iehova ni katoabong ibukin te mwioko anne are I a riki naba Ngai bwa kaaina temanna.” E taekina ae kangai temanna te roro n rikirake are kaain naba te kurubu anne: “Bon te kabanea n tamaroa i nanoni maiu te mwakuri aei!”
4. N ningai te tai ae angaraoi iai te bubutii ibukini karaoan aono aika aki bati ni mwamwakuriaki?
4 A rangi ni bati taabo aika aki bati ni mwamwakuriaki n ara aono. Ko kona ni kaota tabeakinaia kaaina ni buokiia? Tao ko kona n uarongorongo n te aba are ko maeka iai ke n te kaawa are ko bungiaki iai, ke n aono aika aki bati ni mwamwakuriaki ake a kaan ma am tabo. Ko kona ni kabongana am bong ni motirawa ke motirawan te reirei n airi ma am utu nakon aono ake a aki bati ni mwamwakuriaki? Ti na boni kakabwaiaaki n taai nako ngkana ti anga boni ngaira ni buokiia tabemwaang. Ko bia “kata Iehova [ngkoe ma am utu] ma n noria ba E raoiroi,” n aromi n anga ngkami bwa kam na karaoi aono aika aki bati ni mwamwakuriaki.—TaiAre. 34:8.