Kabongana n Taai Nako
1. Tera manenan te turaeki ae Ko Kan Ataa te Koaua?
1 E a tia ni katauraoaki te turaeki ae Ko Kan Ataa te Koaua? bwa e na buokira ni moani reirei n te Baibara. Ma bon te bwai naba ni mwakuri ae uaana ae ti kona ni kabongana ni kamrara iai koraan te koaua. (TeMin. 11:6) Aikai aanga tabeua ake a na buokira ni kabongana raoi te turaeki aei.
2. Ti na kanga ni kona ni kabongana te turaeki ni moana te maroro iai?
2 Moanakin te Maroro: Ko kona n angani kaain te auti te turaeki, ni kaoti titiraki aika onoua ni moani baana ao n titiraki ni kangai: “E nga mai buakon titiraki aikai ae ko kan ataa kaekaana?” Imwin ana kaeka, maroroakina teuana ana titiraki kaain te auti ao ana kaeka te Baibara ae kaotaki n te turaeki ao wareka teuana te kibu. Wareki ke kakimototoi kanoani bukini baan te turaeki, ao kaota te boki ae Ana Reirei te Baibara. E ngae ngkana e aki butimwaea te boki, ma e a reke te turaeki irouna are e na kona ni buokia ni karina wakaan te koaua i nanona.—Mat. 13:23.
3. Tera ae ti kona ni karaoia ngkana e tabetabe kaain te auti?
3 Ngkana E Tabetabe Kaain te Auti: Ko kona ni kangai: “Kioina ngkai e aki angaraoi te tai aei ibukim, ao N na katuka te turaeki aei iroum. E karinanaki i nanona titiraki aika onoua aika bebete ae angiina mai buakora a aki toki n titiraki iai, ao e kamatataaki raoi iai ana kaeka te Baibara nakon titiraki akanne. Ngkana I kaitiboo ma ngkoe n te tai teuana ao N na kukurei n ongora mairoum bwa tera am iango iai.”
4. Tera ae ti kona n taekinna ngkana ti anga te turaeki n ara uarongorongo irarikin te kawai?
4 Ngkana Ko Uarongorongo Irarikin te Kawai: Ko kona ni kangai: “Mauri. Ko a tia n tabeki titiraki n ai aron aikai? [Kariaia te kaeka.] E kamatataaki raoi n te turaeki aei kaeka aika karaunano ake n te Baibara.” Ngkana e aki kawaekoa te aomata, ko kona ni maroroakina te kaeka teuana man te turaeki ao ni kaota naba te boki ae Ana Reirei te Baibara.
5. Ti na kanga ni kona ni kabongana te turaeki n taai tabetai n auti ake a nakonako kaaia?
5 Auti Ake A Nakonako Kaaia: N aono tabeua, ao a a aki toki taan uarongorongo ni kaakatikui maekatin n auti ake a nakonako kaaia. Ngkana anne anuaia kaain am ekaretia, bukin tera bwa ko aki katuka te turaeki ae Ko Kan Ataa te Koaua? Ko kona ni kangai ni manga okim: “Akea ngkoe n am auti ngke ti roko iai mai mwaina, ai ngaia ae ti a katuka iai te turaeki aei. E nga mai buakon titiraki aikai ae ko tangira kaekaana?”
6. Tera ae karika te turaeki ae Ko Kan Ataa te Koaua bwa te bwai ni mwakuri ae uaana n tain te uarongorongo?
6 E taekini koaua n te aro ae kai ota ma n teretere raoi te turaeki ae Ko Kan Ataa te Koaua. E ringi nanoia te koraki ake a mena n Aaro nako ao ni katei nako. E bebete aroni kabonganaana, e ngae ngkana te roro n rikirake ke te tia uarongorongo ae boou. Ko kakabongana te turaeki aei n taai nako aika angaraoi?