“Ko na Tai Maku”
1. Baikara kangaanga ake e kaaitarai Ieremia ae ti kona ni kaaitara naba ma ngaia?
1 E namakinna Ieremia bwa e aki tau n riki bwa te burabeti ngke e mwiokoaki n te moan tai. Ma e karauaki nanona iroun Iehova ma te akoi ni kangai: “ko na tai maku,” ao e kakorakoraaki bwa e na kakororaoa mwiokoana. (Ier. 1:6-10) A kona n rota karaoan ara mwakuri ni minita n ara bong aikai, maamaara ao iangoan ae ti aki tau iai. N taai tabetai, e kona n totokoira man taekinan te rongorongo maakakin aroia aomata ni butimwaeira ke aron taraakira irouia. Ti na kanga ni kona n tokanikai i aon te aeka ni maaku anne, ao baikara kakabwaia ake ti na karekei?
2. E na kanga te katauraoi ni buokira ni kakerikaaka maakura n te mwakuri ni minita?
2 Moantaai ni Katauraoi: E kona ni kakerikaaka maakura te katauraoi raoi. N te katoto, ngkana ti moantaai n rinanoi taeka n totoko, ti na kona n tauraoi iai ni kaekai taeka n totoko aika okioki. (TaeRab. 15:28) E aera ngkai ko aki karaoa am kataneiai n te Taromauri n Utu ni katauraoiko ibukini kaaitarakini kangaanga aika kakaokoro n te tabo n reirei ao n te mwakuri ni minita?—1 Bet. 3:15.
3. E na kanga ni buokira onimakinan Iehova n tokanikai i aon te maaku?
3 Onimakina Iehova: E kona ni kairira onimakinan Atuara bwa ti na tokanikai i aoni maakura. E berita Iehova bwa e na boni buokira. (Ita. 41:10-13) Anne bon te kamanomano ae te kabanea ni korakora ae ti kona ni karekea. Irarikin anne, e kauringira Iesu bwa e ngae ngkana ti kaaitara ma titiraki aika aki kantaningaaki, e na kona ni buokira taamnein te Atua n tataekina te rongorongo n te aro ae riai. (Mareko 13:11) Mangaia are, teimatoa n tataro ni butiia Iehova taamneina ae raoiroi.—Ruka 11:13.
4. Baikara kakabwaia aika kona n reke man nanomwaakara n te mwakuri ni minita e ngae ngkai ti kaaitara ma kataaki?
4 Kakabwaia: Ngkana ti nanomwaaka n te mwakuri ni minita e ngae ngkai ti kaaitara ma kataaki, ti na kakorakoraaki ni kaaitarai kataaki n taai aika a na roko ao n tokanikai iai. Ti karikirakea te nanomatoa ao te ninikoria ae aroaroia te koraki ake a kaonaki n te taamnei ae raoiroi. (Mwa. 4:31) Irarikin anne, ngkai ti a tokanikai i aoni maakura man ana ibuobuoki Iehova, ti a kakorakoraa iai ara onimaki ao onimakinan ana aro ni kakamaiu. (Ita. 33:2) Ti kona naba ni karekea te kimwareirei ao te raunnano ae nako man ataakin ae ti kakukureia Tamara are i karawa. (1 Bet. 4:13, 14) Ti bia aki maaku ngkanne n tataekina rongorongon te Tautaeka n Uea ma te ninikoria, n teimatoa n onimakina ana ibuobuoki Iehova!