Te Bwai ae E Katauraoaki Ibukia Kristian Aika Minita
1. Tera te babaire ae boou are e moanaki n te ririki 1938, ao bukin tera?
1 E moanaki te babaire ae boou n ana botaki Iehova n te ririki 1938. A kaoaki ekaretia aika mwaiti bwa a na botaki ni kaei ruunga n aaba tabeua, ake aranaki ngkai bwa runga n aono. Bukin tera? E kaekaaki anne n te beeba ni kaongora ae te Informant (ngkai n Ara Mwakuri ni Minita Ibukin te Tautaeka n Uea) n Tianuare 1939 ngke e kangai: “Bon te babaire n Ana Botaki Iehova ruunga aikai ake a kaira karaoan te beku ibukin ana Tautaeka n Uea. E kakawaki te reirei ae katauraoaki aei ibukira n tatabemanira nako bwa ti na karaoi mwakuri ake ti mwiokoaki iai.” E noraki te rikirake ibukia taan tataekina te Tautaeka n Uea man 58,000 n te ririki 1938 nakon te mwaiti ae raka i aon 7,000,000 n te ririki 2009. Ngkana ti iangoa aei ao e a katereaki raoi iai bwa a kakororaoa te kantaninga ruunga aikai ibukini buokaia minita bwa a na “karaoi mwakuri ake a mwiokoaki iai”!
2. Baikara reirei ake a na kabwarabwaraaki n ara runga n aono ibukin te ririki ni mwakuri ae boou?
2 Te Boto n Iango Ibukin te Ririki ae E na Roko: Ti kantaningaa te runga n aono are e na moanaki n Tebetembwa ao te kaungaunga ae e na anganira. E anaaki te boto n iango man Ioane 15:19 ae “Kam Aki Arona Aroia Kaain te Aonnaba.” Baikara kabwarabwara tabeua ake a na kakabwaiaaki iai Kristian aika minita? Ti na ongora te kabwarabwara n te Kaonobong ae “E Kamanoira te Mwakuri ni Kabwanina Ara Tai—Ni Kanga?” Ti na kimwareirei naba n te reirei ae tenua mwakorona ae “Tai Kabarekaaki Iroun . . . ” “Te Man ae e Tiritiri,” “Te Kabekaau ae Kakannato,” ao “Taan Iokinibwai.” Ti na ongora n te Taabati te reirei ae mwaiti mwakorona ma te boto n iango ae “Tangira Iehova, ma Tiaki te Aonnaba.” A na karaoaki naba kabwarabwara aikai “Teimatoa n ‘Iruwa ao Taani Maeka n Iruwa’” ao “Kaninikoriaingkami! Ko Kona n Tokanikai i Aoia Kaain te Aonnaba.”
3. Baikara kakabwaia aika ti na karekei mani kaean te runga n aono?
3 Imwini kaean te runga n aono iroun temanna te tari aine are e a aki bati ni kakaraoa te mwakuri ni minita, e koreia bwa e buokia te runga n aono bwa e na iangoa riki arona ao ni kamatoaa nanona bwa e na “ira te mwakuri ni minita ao n aki manga karekea aonana!” Akea te nanououa bwa e na buokira ni kabane te runga n aono ibukin te ririki ni mwakuri ae boou, bwa ti na tangira Iehova nakon ae ti na tangira te aonnaba. (1 Ioa. 2:15-17) Taraia raoi bwa ko na boni kaea ao ni kakauongo raoi, bwa ko aonga ni kakabwaiaaki mani baika a katauraoaki ma te tangira ibukia Kristian aika minita!