“E Kakoauaaki Wanawanan te Aomata Man Ana Mwakuri Aika Raraoi Ake E Karaoi”
1. Tera aron iangoan ara mwakuri irouia tabeman?
1 N taai tabetai tao ti kona ni kaitiboo ma kaain te auti aika a aki butimwaea ara rongorongo ibukina bwa e kairua aia koaua ni kaineti ma ngaira ke a a tia n ongo rongorongoia Ana Tia Kakoaua Iehova aika kewe. Tao a kona ni kaman rotakibuaka aia iango imwin rongorongo ni kabuakaka mani waaki ni kanakorongorongo. N taabo tabeua ti a tia naba ni kairuaki bwa “te koraki n aro ni kewe teuana ae karuanikai.” Tera arora ae riai ngkana ti kaitiboo ma aeka ni kabuakaka aikai?
2. Tera ae na buokira ni kanakoa te bwarannano ngkana ti kaaitara ma te kabuakakaaki?
2 Kateimatoa te Iango ae Raoiroi: A okioki naba ni kakeweaki ao n uaraoaki Iesu ao ana toro Iehova tabeman n te moan tienture. (Mwa. 28:22) Ma a bon aki naba kariaia uaraoakia bwa a na namakina iai te maamaa n aia mwakuri ni minita. E taku Iesu: “E kakoauaaki wanawanan te aomata man ana mwakuri aika raraoi ake e karaoi.” (Mat. 11:18, 19) E teimatoa ni karaoa nanon tamana ma te ingaingannano Iesu bwa e kakoauaa ae a na nora kakawakin te rongorongo ae raoiroi taan ukoukora te koaua. Ti kona ni kanakoa te bwarannano ngkana ti ururingnga are e a tia naba Natin te Atua n rinanon te aekaki aei.
3. E aera ngkai ti riai n aki mimi n rongorongoni kabuakakakira ao kaaitarakira?
3 E kaotia Iesu ae e na ribaiia taan rimwina te aonnaba n ai arona ngkai e ribaia naba. (Ioa. 15:18-20) Mangaia are, ti riai n aki mimi n rongorongo ni kabuakaka ao kaaitarakira ni boong aikai. Ni koauana, ti riai ni kantaningaia ae a nang rikirake ni korakora baikai ngkai ti a mena i nanoni kabaneani boong aikai, ngkae e a korakora unin Tatan. (TeKao. 12:12) Ti kona ni kimwareirei ngkai e a kaotaki n aei bwa e a kaan tokin ana aonnaba Tatan.
4. Tera arora ni kaeka ngkana ti kaitiboo ma tabeman aika a bubuaka aroia nakon te rongorongo ae raoiroi?
4 Kaeka ma te Akoi: Ti riai ni kaeka ma te akoi ao te nimamannei n taai nako ngkana ti kaekaaki n taeka aika bubuaka. (TaeRab. 15:1; IKoro. 4:5, 6) Ngkana e riai, tao ti kona ni kabwarabwaraa nakoni kaain te auti ae e raoiroi nanona ae e aki ota raoi ibukia Ana Tia Kakoaua Iehova ke ko kona n titirakinna bwa e aera ngkai e namakina naba anne. E kona ni kauekea te nanououa iroun te aomata ni baike e ongoraei ibukia Ana Tia Kakoaua Iehova man ara kaeka aika nimamannei ao ni kan ongora nakon te tai ae na roko ngkana e a manga okiraki iroun te tia Kakoaua. Ma ngkana e rangi n un kaain te auti, e raoiroi riki ngkana ti kitanna. N aki ongeia bwa tera aron taraakira irouia aomata ma ti kona ni kakoauaa raoi ae e kakawaki ara mwakuri ni minita iroun Iehova.—Ita. 52:7.