E Kaatuua Taraan te Bwai ae Tii Teuana Matam?
1. Tera ae nanonaki n ae e na “kaatuua taraan te bwai ae tii teuana matam”?
1 A kona n rotaki ara mwakuri ni baika ti taraia iai. Ai etira ana taeka Iesu aikai: “Ngkana e kaatuua taraan te bwai ae tii teuana matam, ao e na oota rabwatam ni kabane”! (Mat. 6:22) Ngkana e ‘kaatuui taraani’ baika kaineti ma te onimaki matara, e a katurua iai iangoan te kantaninga ae tii teuana are karaoan nanon te Atua. Ti moanibwaia te Tautaeka n Uea ao a aki anaaki nanora ni bwaikorakin te maiu aika akea manenaia ke mwakuri ake a na tuka te mwakuri ni minita.
2. Tera ae kona ni mwamwanaa ara iango, ma tera ae kona ni buokira?
2 E Kainnanoaki Tuoan Raoi Arora: E kona ni mwamwanaaki ara iango ni katanoata n anainano rinanon te waaki ni kanakorongorongo are e tuangira baika ti kainnanoi ke ni baika iai irouia aomata. Imwaini moanakin ukoukorani ke kabooan te bwai teuana ae e kainnanoa te tai ae bati, te mwane, ke te korakora, e raoiroi riki bwa ti na “warebwaia te kabanemwane” ni bon titirakinira bwa ‘E koaua bwa e na karikirakea au beku ibukin Iehova te baei ke e na katotonakoa?’ (Ruka 14:28; IBir. 1:9-11) Ti wanawana naba ngkana ti iaiangoia bwa ti na kanga ni kabebetea riki maiura n te aro bwa ti na kabatiaa riki karaoan te mwakuri ni minita.—2Kor. 13:5; IEbe. 5:10.
3. Tera reireiara ae ti kona ni karekea mairoun te tari aine temanna are e karaoa te bitaki bwa e na kabebetea maiuna?
3 Ngke e moana ana regular bwaiania temanna te tari aine, ao e rineia bwa e na teimatoa n ana mwakuri ni kareketianti are e kabwanina ana tai iai, e ngae ngke e boni kona n reke ana tianti ae tau ibukini kainnanona n te mwakuri ae itera n tai. E taku n tokina, neiei: “Bon akea ae kona n toro irouia tooka aika uoman. I riai ni kakeai baika I tangiri bwa a aonga n reke baika I kainnanoi. I a ataia ae a kai mka ao akea manenani bwaikorakin te maiu ao ngkana I kakorakoraai ni karekei baika I taku bwa I tangiri ao I boni kakuaai iai.” Ni waakini maiun neiei ao e boni kona ni karaoi bitaki ni kaineti ma kabebetean riki maiuna ao ni bita naba ana mwakuri ni kareketianti, n te aro are e a kona iai ni kateimatoa ana mwakuri ni bwaiania.
4. E aera bwa e kaumakaki bwa ti na kateimatoa kaatuuan taraan te bwai ae tii teuana ngkai?
4 E rangi ni kakawaki bwa ti na teimatoa ni kaatuua taraan te bwai ae tii teuana ni matara ngkai e a uarereke te tai. Ni katoaa banen te bong teuana ma teuana, ti a tabe riki iai n uakaan ma tokin te waaki ae ngkai i aon te aba ao moanakin ana waaki ae boou te Atua i aon te aba. (1Kor. 7:29, 31) Rinanoni kaatuuan te mwakuri n uarongorongo, ti a kona iai ni kamaiuira ma te koraki ake a ongora iroura.—1Tim. 4:16.