Tera ae A Kona n Reiakinna Aomata Mani Matakuakinam?
1. Tera reireiaia taan rimwin Iesu mani matakuakinana?
1 E taku Iesu: “Amoa amou i aomi ao reirei irou.” (Mat. 11:29) E teretere bwa e reireinia aomata ni katean te banna ni katoto ae raoiroi ao tiaki tii n ana taeka. Iangoa aron reiakinaia taan rimwina are a karekea mani matakuakinan Iesu. E nimamannei, e akoi, ao e tatangira. (Mat. 8:1-3; Mareko 6:30-34) E kaotiota te nanorinano ni koaua. (Ioa. 13:2-5) Ngke a ira Iesu taan rimwina n te mwakuri ni minita, a noria bwa te tia mwakuri ae tataningamarau ao e uaana ana angareirei ibukin te koaua nakoia aomata. (Ruka 8:1; 21:37, 38) Tera aron rotakia aomata ni matakuakinara ni karaoan ara mwakuri ni minita?
2. A kanga aroarora aika raraoi n te mwakuri ni minita n anai nanoia kaain te auti?
2 Kaain te Auti: E kona n rangi ni korakora rotakia kaain te auti n arora ni kunnikainira, ataakin te katei, ao tabeakinaia aomata ma nanora ni koaua. (2Kor. 6:3; IBir. 1:27) A bon norira bwa ti aki toki ni kakamanena te Baibara. A anaaki nanoia tabeman ni kakauongora ma te karinerine ngkana a taetae. Tai kauarerekea kakawakini katean te banna ni katoto n anga aikai bwa e kona ni burimaunia aomata nakon rongorongon te Tautaeka n Uea.
3. Baikara aanga aika raraoi ake a kona n rotaki iai tarira n te aro ae raoiroi?
3 Tarira: Iangoi naba aron rotakia tarira n angaa aika raraoi ake a kona n ibuobuoki nakoia. A kona n rotaki n ingaingan nanora n ara mwakuri ni minita. N aron te biti ae taima te biti, e na kona ni kaungaia tabemwaang bwa a na karikirakea rabakauia n uarongorongo ngkana ti katauraoi raoi. (TaeRab. 27:17) Arora n teimatoa ni kakaonimaki n tau mwia te koraki ake a kaota te kan ongora ao kakaonimakira n okiokiria, e na buokia tabemwaang bwa a na karaoa naba aron anne. A na kona n rotaki raora ni mwakuri n te aro ae raoiroi mani kakororaoan raoi ara mwakuri ni minita.—2Tim. 4:5.
4. E aera bwa ti riai n tuoi ara banna ni katoto n taai tabetai?
4 E kakawaki n taai tabetai tuoan raoi te bwai ae ko kakaraoia, ae ko taekinna ao aron rotakia tabemwaang iroum rinanon am katoto? E na kakukureia Iehova kaotan ara banna ni katoto aika raraoi ao e na buokira n namakina are e riki naba nakoni Bauro ngke e taekina ae kangai: “Riiki bwa taani kakairi irou, n ai arou ngkai I kakairi irouni Kristo.”—1Kor. 11:1.