Te Mwakuri ae Moanibaan te Kakawaki
1. Baikara karea ake ti kairaki bwa ti na anga ibukin ara kakaitau ae korakora n ara mwakuri ni minita?
1 E aera ngkai ti kaungaaki bwa ti na kabanea ara tai, korakorara, ao kaubwaira n te mwakuri ni minita? Ibukina bwa e rangi ni kakawaki riki nakoni mwakuri ake tabeua! E na karikirakea i nanora te kani buoka karaoan te mwakuri ae e aki okioki karaoana aei n iaiangoan uaana ae teimatoa.—Mwa. 20:24.
2. E kanga ara uarongorongo ni buoka katabuan aran Iehova ae kakannato?
2 Katabua Aran Iehova: E katuruturuaki n te mwakuri n uarongorongo bwa e na kamaunai tautaeka n aomata ni kabane ao ni katauraoa katokan aia kangaanga ni kabane te botannaomata, ana Tautaeka n Uea Iehova rinanoni Kristo Iesu. (Mat. 6:9, 10) E neboaki Iehova ngkai bon tii ngaia ae kona ni kamaiuira man te aoraki ao te mate. (Ita. 25:8; 33:24) Tao a na neboa Iehova aomata ake a taratarai ara mwakuri aika raraoi ao ingaingara ngkai ti kaotiota arana. (1Bet. 2:12) Ai kimwareireira ngaira ni kaotiotan aran te Uea ae Moan te Rietata ae Iehova ni kabutaa te aonnaba!—TaiAre. 83:18.
3. Baikara kakabwaia ake a karekei te koraki aika kukurei ni butimwaea rongorongon te Tautaeka n Uea?
3 Karekea te Maiu: “E aki tangira kamaunaan temanna [Iehova] ma e tangiriia aomata nako bwa a na rairi nanoia.” (2Bet. 3:9) Ma e ngae n anne, a na kanga aomata n reiakin aroaro aika e iangoi Iehova bwa a riai ke a aki riai, ngkana akea ae reireinia? (Iona 4:11; IRom 10:13-15) Ngkana a butimwaea te rongorongo ae raoiroi aomata ao a na boni katamaroaa riki maiuia n aroia ni kitani mwakuri n iowawa. (Mika 4:1-4) Irarikin anne, a karekea te kantaninga ae kakimwareirei ibukin te maiu ae e aki toki. E boni kamaiuira ao te koraki ake a ongora iroura ara mwakuri n uarongorongo ao n angareirei. (1Tim. 4:16) Ai rinera te mwioko ae ti karekea n te mwakuri ae te kabanea ni kakawaki aei!
4. E aera bwa ti riai ni karaoa ara kabanea ni kona n uarongorongoa te Tautaeka n Uea ao te mwakuri ni karekeaia taan rimwini Kristo?
4 E a kaan rokon te rawawata ae korakora are e nang karina iai tokin te aonnaba ae buakaka aei. A na maiu te koraki ake a taromauria Iehova. Mangaia are bon te mwakuri ae te kabanea ni kakawaki ao ni manena te mwakuri n uarongorongo ao karekeaia taan rimwini Kristo ae tabe ni waakinaki ngkai, ao e riai kaumakana. Ti bia moanibwaia i nanoni maiura!—Mat. 6:33.