Te Reta Mairoun Te Rabwata n Tautaeka
Nakoia Raora Aika Taani Kakoaua Ibukin Iehova:
Ai boni kakabwaiaakira ngaira aika aomata ngkai ti tataekina aran te tia Tautaeka i aoni Bwaai ni Kabane ae Iehova! Te ara anne bon akea tokina, e na bon aki kona ni kamaunaaki, ao akea kabotauana. Bon Iehova ae e anganira arana bwa ti na kaotiotia, ao moarara riki ni moa man te ririki ae 1931, ti a ingoanaki n te ara ae kaokoro anne. (Ita. 43:10) Ti rangi ni kukurei ma ni kamoamoa ngkai ti a ingoanaki bwa Ana Tia Kakoaua Iehova.
E aki toki te Riaboro ni kataia ni kamauna aran te Atua. A rarawa nakon aran Iehova te botannaomata i aan ana kairiri te Riaboro. E ribaa te ara ae tabu aei Baburon ae Kakannato ae te botaki n Aro ae kewe ae katobibia te aonnaba ao e a tia ni kanakoi aran Iehova mani Baibara aika bati ake a rairaki. Ni kaitaraan anne, e karietataa aran Tamana Iesu ngke e moanibwaia n ana tataro ni katoto are e reireinia iai taan rimwina. E taku: “Ma kam riai n tataro n aron aei: “ ‘Tamara are i karawa, e bia katabuaki aram.’ ” (Mat. 6:9) Imwina, e taekina ae kangai n ana tataro ae nako mai nanona nakon Tamana: “I a tia ni kaotiota aram nakoia aomata ake ko anganai mai buakoia kaain te aonnaba. Bon am bwai ngaiia ao ko anganai, ao a kakairi n am taeka.” (Ioa. 17:6) Kioina ngkai ti tangiria ni kakairi n ana katoto aika raraoi Iesu, ti a kakorakoraa nanora bwa ti aonga n teimatoa ni kaotiota aran Iehova ni kabutaa te aonnaba.
Te kibu ibukin te ririki 2009 ae “Katereterea te rongorongo ae raoiroi,” e kairira bwa ti na kakororaoa raoi ara mwakuri ni minita. (Mwa. 20:24) Bon akea te nanououa bwa e a tia Iehova ni kakabwaiaa ara kakorakora n te ririki ni mwakuri ae tibwa nako aei. E bati te mwakuri n uarongorongo ae karaoaki ibukin neboan ao karinean aran Iehova ni katobibia te aonnaba. A botii bwanaaia n uarongorongo nakoia aomata ni kabane taan uarongorongo aika 7,313,173 ae te mwaiti ae boou ae te kabanea ni bubura. A reiakinia naba te koraki ake a raoiroi nanoia ake a ukoukora buokan aia kangaanga aika mwaiti ake a kaaitara ma ngaai ni katoa bong. Te mwaiti ake a roko ni Kauringani mateni Kristo aika 18,168,323 a kaotia bwa tao iai riki mirion ma mirion ake a na wetea aran Iehova imwain tokin te waaki ae buakaka ae ngkai.
Ti na teimatoa n tataekina te rongorongo ae raoiroi ibukin te Tautaeka n Uea ma te ingaingannano, ao ni kamanenai angaa nako bwa ti aonga n roko irouia aomata ake kaain ara aono, ni karokoa ae e tuangira Iehova bwa ti na toki. (Mat. 24:14; Mareko 13:10) E ngae ngke ti tataekina te rongorongo man te auti teuana ma teuana, i nanon te kawai, n te reta ao n te tareboon ke n te tai ae e aki baireaki, ti bia kakorakoraira ni kaotiota aran Iehova ao ana kantaninga nakoia aomata aika bati n aron ara kona.
Iai bukina aika mwaiti ae ti riai n onimakina iai Iehova bwa e na boni waekoa ni katabua arana. (Etek. 36:23) E nang roko te tai are a nang kainabwabu iai te koraki ake a kamatauninga arana. Ai kakimwareireira te bong anne ibukia ana toro Iehova aika kakaonimaki ni kabane, ake a tia ni kaotiota aran Iehova ao ni boutokaa riaina n tautaeka i aoni bwaai ni kabane!
Ai boni mataatara raoi tabeakinaia ana aomata Iehova irouna n te bwabwaro ae “Teimatoa n Tantani!” A boni karaoaki Bwabwaro ao Bwabwaro Ibukin Aaba Aika Kaokoro n angin aaba ni katobibia te aonnaba. A riki bwabwaro aikai bwa mwaneka aika kakawaki n rongorongon ara beku iroun te Atua, ao a kairira naba bwa ti na ataa raoi kainnanoan te kamarurung n tantani ibukin ana bong Iehova.—Mareko 13:37; 1Tet. 5:1, 2, 4.
Ni koauana, e raoiroi Iehova nakoira bwa e kaon nanora n te kimwareirei. E kaweneira n tawaana n uteute aika mawawa ao e kairirira nako rarikin raan aika e rau te aba iai.—TaiAre. 23:1, 2; 100:2, 5.
Onimakinan raoi Iehova e kateimatoa te kakabwaia i aom ngkai ko katabetabeko n te beku ibukin te Tautaeka n Uea i nanon namwakaina rake aikai!
Te tangira ni Kristian nakoimi tarira ni katobibia te aonnaba,
Tarimi,
Te Rabwata n Tautaeka Ibukia Ana Tia Kakoaua Iehova