Nnen Titiraki
◼ A na kanga aomata nako ni buoka kateimatoaan te aroaro ae rau bwa ti aonga ni kan reiakinaki ni bobotaki n te ekaretia? (TuaKau. 31:12)
Te karinerine ae korakora ibukin Iehova ma ana babaire ibukin taiani bobotaki n te ekaretia, a kaungaira ni kabaneira bwa ti na moantaai n roko ao n tauraoi n reiakinaki irouna. E na rangi n ibuobuoki ngkana a kaainaki kaintekateka ake i moa n te tabo n taromauri, ao ni katukaki ake i buki ibukia ake a uarereke natiia ao ake a rimwi n roko n tabetai. A riai n taraaki raoi bwaai n aron te tareboon ae uouotaki ke bwaai riki tabeua bwa a na aki katabetabeia taan ongora. E na kona ni karako ke n uarereke uruanakin te botaki ngkana a bane aomata ake a roko ni kateimatoa te nano ni karinerine i nanon tain te botaki ni kabane.—TeMin. 5:1; IBir. 2:4.
Ngkana a moana rorokoia ni bobotaki aomata aika boou, tao e kona te aomata are e kinaia n anga nanona bwa e na tekateka i rarikia. E na rangi n ibuobuoki riki aei ngkana iai ataei aika uarereke ake a na kataneiaaki. Tao e kona ni boou te waaki ae kaeani bobotaki irouia kaain te utu. Ngkana ngaia anne, a na bae ni kukurei riki kaaro n tekateka mai buki ike a na aki uruana te ongora ngkana arona bwa a a riai ni kitana te tabo ni botaki teutana te tai ibukin tabeakinani kainnanoia natiia aika uarereke. (TaeRab. 22:6, 15) A aki riai utu n tekateka ni kamaenakoia ma natiia aika uarereke n te aro are a na kona n namakinna ataei bwa a kona ni karongoa. E rangi n tamaroa iroun te karo bwa e na kairiia raoi natina n reireinia ke n tabeakini kainnanoia tabeua i tinanikun te tabo ni botaki ao ni manga oki nakon te tabo ni botaki ma natina.
A buoka kateimatoaan te aroaro ae riai n te tabo n taromauri taan ibuobuoki. A buokiia utu ao te koraki ake a rimwi n roko n tabetai ni karekei aia tabo n tekateka. A iangoa raoi bwainan te taetae ma te akoi ao te karaurau taan ibuobuoki ngkana a buokiia aomata ni karekei aia tabo n tekateka, ao n aki uruana te ongora. A wanawana ni bairea raoi tabeakinan itera aika aki kantaningaaki aika uruana te botaki. Ngkana e a moanna te teei n uruana te ongora, a kona taan ibuobuoki n anga aia ibuobuoki ma te akoi.
A kona aomata nako ake a roko n te botaki ibukin te taromauri, ni buoka karekean te aroaro ae rau bwa ti aonga ni kan reiakinaki taekan Iehova ma ana kantaninga ibukin te mweraoi ao te waaki ae boou ma n raoiroi i aon te aba.—Ebera 10:24, 25.