I a Tau Nakon te Uarongorongo?
1. E aera ngkai ti aki riai n namakinna bwa ti aki tau n uarongorongo?
1 Ngkana ko a tia n titirakiniko n te titiraki aei ao tai kabwaraa nanom iai! E aki boto katauara bwa minita ngaira n ara beeba n reirei ke rianakon ara konabwai. A taekinaki tabeman mai buakoia taan rimwini Kristo ngkoa bwa a “uarereke aia reirei ao a aki kakannato.” Ma e ngae n anne, bon taan tataekina te rongorongo ae raoiroi aika uaana ibukina bwa a kakorakoraia ni kakairi n ana katoto Iesu are e kateia.—Mwa. 4:13; 1Bet. 2:21.
2. Baikara aron ana angareirei tabeua Iesu?
2 Aron Iesu n Angareirei: A bebete ana angareirei, a manena ao a kai ota. E katikii nanoia taan ongora n ana titiraki, ana kaikonaki ao ana moantaeka aika aki kangaanga. (Mat. 6:26) E kaotiota raoi tabeakinaia aomata. (Mat. 14:14) Irarikin anne, e taetae Iesu ma te ninikoria ao te mwaaka ngkai e ataia bwa iai riaina n taetae n ataakin ae e a tia Iehova ni mwiokoia ao ni kakorakoraa bwa e na kakororaoa mwiokoana.—Ruka 4:18.
3. E kanga Iehova ni buokira ni kakororaoa ara mwakuri ni minita?
3 E Buokira Iehova: E katauraoa te reirei ni kataneiai ae ti kainnanoia ibukin tataekinan te rongorongo ae raoiroi n te aro ae nakoraoi ara tia Reirei ae Moan te Kakannato, rinanon ana Taeka ao ana botaki. (Ita. 54:13) Ibukina bwa e kawakin rongorongon ana anga n angareirei Iesu Iehova, ti kona n nenera aron Iesu n angareirei ao ni kakairi iai. E anganira taamneina ae raoiroi Iehova ao ni kataneiaira rinanoni bobotaki n te ekaretia. (Ioa. 14:26) Irarikin anne, e katauraoiia taan uarongorongo aika mwaatai ake a kona ni buokira bwa ti na rabakau riki.
4. E aera ngkai iai bukina ae ti na namakinna iai bwa ti tau ni buoka tataekinan te rongorongo ae raoiroi nakoia aomata?
4 A mwaiti bukina ae ti na namakinna iai bwa ti tau n uarongorongo kioina ngkai “e nako katauara mairoun te Atua.” (2Kor. 3:5) Kioina ngkai ti onimakina Iehova ao ni kakaonimaki ni kamanenai raoi baika e katauraoi ibukira, ti na “tauraoi raoi nakoni mwakuri aika raraoi ni kabane.”—2Tim. 3:17.