E Kateimatoa Korakoran Ara Onimaki te Uarongorongo
1. Tera te kakabwaia are ti kona ni karekea man te mwakuri n uarongorongo?
1 E kakorakoraa ara onimaki ao e karikirakea kukureira uataboan te mwakuri n uarongorongo. Ni koauana, ti uataboa te mwakuri ni minita i aan te kantaninga are ti na kakukureia Iehova. Ma e ngae n anne, ongeabara n ana tua are ti na “uarongorongoa te taeka,” ti a karekei iai kakabwaia mairoun Iehova ao ti karekei naba baika raraoi i bon ibukira n aanga aika mwaiti. (2Tim. 4:2; Ita. 48:17, 18) E na kanga ngkanne ni kakorakoraira te uarongorongo ao ni kakukureira?
2. N aro raa ake e kakorakoraira iai te mwakuri ni minita?
2 Ti a Kakorakoraaki ao ni Kakabwaiaaki: E kaungaira te uarongorongo bwa ti na kaatuui kakabwaia man te Tautaeka n Uea n oneani mwin are ti na kaatuui kangaanga ni boong aikai. (2Kor. 4:18) E kakorakoraaki ara onimaki ibukin ana berita Iehova ngkai ti kabwarabwarai ana reirei te Baibara nakoia tabemwaang, ao e karikirakea ara kakaitau ibukin te koaua man te Baibara. (Ita. 65:13, 14) Ngkai ti buokiia aomata bwa e na rikirake aia iraorao ma Iehova bwa a aonga n “aki arona aroia kaain te aonnaba,” ti a kakorakoraa iai ara motinnano ae ti na teimatoa ni kaokoro ma te aba.—Ioa. 17:14, 16; IRom 12:2.
3. E kanga ni buokira te mwakuri ni minita ni karikirakei aroaro ni Kristian?
3 E buokira uataboan te mwakuri ni minita ni karikirakei aroaro ni Kristian. N te katoto, ara kakorakora n “riki bwa bwaai ni kabane nakoia aomata n aekaia nako” e na buokira ni karikirakea te nanorinano ae bati riki. (1Kor. 9:19-23) Ngkai ti maroro ma te koraki ake “a karawawataaki ma ni kananoanga, ao a kamaenakoaki n aroia tiibu aika akea te tia kawakinia,” ti a reiakina iai te nanoanga ao te atataiaomata. (Mat. 9:36) Ngkana ti botumwaaka i aan te aki bwerengaki ke te kaitaraaki, ti a karekea iai nanomwaakara. E karikirakea kimwareireira kamanenaani maiura ni buokiia iai tabemwaang.—Mwa. 20:35.
4. Tera am namakin ni kaineti ma am mwakuri ni minita?
4 Ai kakabwaiaakira ngaira n ara mwakuri ni minita, bwa ti neboa iai teuare tii Ngaia ae riai n taromauriaki! E kakorakoraira te mwakuri ni minita. E uotii kakabwaia aika mwaitikurikuri nakoia te koraki ake a teimatoa ni kabanea aia kona n uataboa ‘kakororaoani kaotiotan te rongorongo ae raoiroi.’—Mwa. 20:24.