Te Katauraoi—Kingin te Manga Oki ae Uaana
1. N te aro ra are e na karababaki iai te mwakuri ni Kristian rimoa?
1 E aki toki Iesu ni katauraoia taan rimwina bwa a na uarongorongoa “euangkerion ueana,” n te aro ae uaana. (Mat. 4:23; 9:35) E kataneiaia Iesu n tii aononi Baretain ngke a tataekina te rongorongo. Ma imwaini waeraken Iesu nako karawa, e kaotia raoi iai bwa e riai ni karababaki te mwakuri ni minita ni Kristian bwa aonga ni ‘kakiritianaki botannaomata ni kabane.’—Mat. 28:19, 20.
2. Tera ae e irekereke ma te ongeaba nakon ana tua Iesu are ‘kakiritianaia botannaomata.’?
2 E irekereke te mwakuri anne ma manga okiraia aomata ake a kaota te kan ongora n te rongorongo ae raoiroi ibukin te Tautaeka n Uea, ao reiakinaia bwa a na kabane baike e tua Kristo bwa a na taui. Ti kainnanoa te katauraoi raoi, ngkana ti kan anai nanoia te koraki ake ti na manga okiriia.
3. Ko na kanga ni karekea manga okiran te aomata ni moani kawarana?
3 Kamani Baireia: Taan uarongorongo tabeman a katea aia titiraki ni banen aia maroro, ao a berita bwa a na manga oki ni maroroakina kaekaan te titiraki anne. A noria bwa kabonganan reirei ake a katauraoaki n te boki ae Ana Reirei te Baibara e buokiia nakon kairan te Reirei n Baibara ma te aomata are a manga okiria.
4. E aera ngkai ti na aki kamaana manga okiraia aomata ni karokoa rokon te maekatin ae boou?
4 Ibukina ngkai tii teuana te maekatin n namwakaina nako, tiaki nanona bwa ti riai n tataninga ni karokoa manga rokon te maekatin ibukin te namwakaina are imwina, ao ti a tibwa okira te aomata anne. Tao e riai ngkana ti moantaai ni manga okira te aomata are e kaota te kan ongora, mani maroroakina te maekatin are e a tia n reke irouna.
5. Bukin tera bwa e manena ataakini baika ko kan karaoi ni manga okiran te aomata?
5 Ataa Bukin Rokom: Kabanea tabeua te miniti imwain okim ni kauring baike ko a tia n taui mwia ao iangoi baika ko kani karaoi n okim. N te katoto, maroroakin reirei tabeua man te boki are ko katikua ma imwaina. Ke katikui booki ni wareware ake a irekereke ma am moan maroro. Ngkana iai am titiraki are ko katikua ma imwaina, ko riai ngkanne ni karekea tiam bwa ko na kaekaa te titiraki anne. Ngkana ko kamataata te rongorongo anne man te kibu, kekeiaki ni warekia raoi man te Baibara.
6. Tera tiara ngkana ti a manga oki?
6 Tiara: Ni koauana, tiara boni moanakin te reirei n te Baibara. N okin te tari mwaane temanna nakon te mwaane temanna ao e kaoia bwa e na reirei mangaia n te Baibara, ma e rawa. Ni manga okin te tari mwaane aei, ao e a uotii maekatin aika boou ao e taku: “N ara tai ni kawaria aomata n te bong aei, ao ti kaeka te titiraki teuana man te Baibara. Imwin ongorana n ana taeka te mwane aei, e a wareka ngkanne te kibu teuana ao te barakirabe man te boki te tari aei, are kabonganaki ibukin te reirei n te Baibara. E a kairaki iai te mwane aei bwa e na reirei n te Baibara ni katoatai.
7. E na kanga ni buokiko te katauraoi raoi ni moanakin te reirei n te Baibara?
7 E rangi ni bongana te katauraoi raoi imwaini kawaraia aomata. E na karikirakea kimwareireira, ao tao ti na kakabwaiaki ni buokan temanna ae e ‘raoiroi nanona,’ nakon touan kawain te maiu.—Mwa. 13:48.