E Manena Ngkai Ana Kairiri te Baibara?

A TAKU TABEMAN BWA E AKI. E kabotaua kabonganaan te Baibara ibukin te kairiri te taokita temanna, ma kabonganaan te textbook are bwain 1920 tabun n reireinia iai kaain te chemistry. E kona n tuangko te aomata ae aki karinea te Baibara, bwa ai aron ae ko kabongana bokin te kaombiuta ae te katei nikawai ni mwakuria iai te kaombiuta ae te katei ae boou. N taekana teuana, a iangoia tabeman bwa ai akea uaan te Baibara bwa e a bane taina.

E aera bwa a na kabongana aomata te bwai ni kairiri nikawai n te aonnaba ae e a mamate nanoia kaaina ni kukune aika boou? A bati taabo ao rongorongo n te Intanete aika kaokaotii iango ao reirei aika boou. Ao taani kanakorongorongo a kakanakoi aia rongorongo taokitan te iango, taani boutokai aroaro ni maiu tabeua, ao taani korei booki n reirei. A mwaiti booki aika kaboonakoaki aika kaotii aroaro ni maiu aika kakaokoro. Bon te bitineti ae korakora te karekemwane iai.

Ngkai a tatauraoi n taai nako rongorongo aika boou aikai, e aera bwa ti na tabe ma te Baibara—ae te boki ae tia koreana e kaania 2,000 te ririki n nako? Tiaki a bon eti naake a aki karinea te Baibara n taekina ae kabonganaan te boki nikawai ibukin te kairiri, kaanga ai aroni kabonganaan te boki ni chemistry ke ni kaombiuta ae e a bane taina? E boni kairua te iango anne. E kakai bitaki te rabakau n aonnaba ae te science ao taiani kukune, ma te koaua bwa e a tia ni bitaki aroaroia aomata? A teimatoa aomata n tangiria bwa e na manena maiuia, a na kukurei ma ni mweraoi, e na nakoraoi te reitaki n aia utu, ao a na reke raoraoia aika raraoi.

E ngae ngke te boki nikawai te Baibara, ma e kona n ibuobuoki i aoni baikanne ao a a bati riki. E taekinaki naba iai ae e kairaki koreana iroun ara tia Karikiriki. E taekinna iai bwa e na kona ni kairira n iterani maiura nako ao ni katauraoira bwa ti na tokanikai ni kakaraoa ae riai n taai nako. (2 Timoteo 3:16, 17) Ao irarikina e taekinna bwa iai i nanona reirei ni kairiri aika akea tokia, aika taeka n reirei aika aki babane taia! E taku te Baibara: “E maiu ana taeka te Atua.”—Ebera 4:12.

A boni koaua ana taeka te Baibara aikai? Te koaua bwa e a boni bane taina? Ke bon te boki ae te kabanea ni manena ibukin taai aikai? Te kantaninga ibukini boreetian Te Taua-N-Tantani aei, ae te moani maekatin i buakoni maekatin aika raka aroia, bwa e na buokiko ni kakaaei kaeka nakon titiraki aikai.