“Ma te Ingainga ao te Tangira ae Bati Riki i Nanora Nakon Are Mai Mwaina”

E A TABE ni korakora te kabuebue n ingabongin te Kanimabong n Tebetembwa 1922, ao a uarurung aomata aika 8,000 nakon te tabo ni botaki teuana. E katanoataa te tia babaire bwa n te botaki ae kakawaki aei, a inaomata n otinako aomata, ma akea ae e kariaiakaki ni manga rin ngkana e otinako.

A aneneaki kuuna ni kaukuki ao imwina e a keerake Joseph F. Rutherford nakon ana tabo te tia kabwarabwara. Angia taan ongora a tekateka ma te kakantaninga. Tabeman a a ririaki ibukin te kabuebue. Ma e kaungaia te tia kabwarabwara bwa a na tekateka n ongora. Ngke e a waaki te kabwarabwara, iai ae e nora te kunnikai ae tinetine are karauaki n rukumaki i eta?

E maroroakina Brother Rutherford te boto n iango ae “E a kaan roko te tautaeka n uea ae bwaini karawa.” E taonaanako te tabo ni botaki bwanaana ae nene i nanon tao teuana ao te iterana te aoa, ngke e maroroakin taekaia burabeti rimoa ake a ninikoria n tataekina rokon te Tautaeka n Uea. Ngke e nang roko n tokina, e titiraki ni kangai, “Kam kakoauaa ae e a tia ni moana ana tautaeka te Uea ae mimitong?” A takarua n te bwanaa ae korakora taan ongora ni kangai: “Eng!”

E kanenea bwanaana ni kangai Brother Rutherford: “Ngaia are waakina te mwakuri, ngkami aika natin te Atua ae moan te rietata! Noria, e a uea te Uea! Bon taan tataekina rongorongona ngkami. Mangaia are kaotiotia, kaotiotia, kaotiotia.”

N te tai naba anne, e a bwaranako te kunnikai are tine i eta, ao e a oti te koroboki i aona ae kangai: “Kaotiota te Uea ao te Tautaeka n Uea.”

E ururing ni kangai Ray Bopp: “A roko nanoia taan ongora.” Ao Anna Gardner e kabwarabwaraa aroni “mwaingingin taian oka n te uboubo ae bati.” E taku Fred Twarosh: “A bane n teirake taan ongora n tii teuana te tai.” Ao e taku Evangelos Scouffas: “Ai aron ae iai te korakora ae katikira ni kateirakeira man ara kaintekateka, ao ti bane n tei ma rannimatara aika waanako.”

A bati ake a roko n te bwabwaro anne ake a a kaman tataekina te rongorongo ae raoiroi ae taekan te Tautaeka n Uea. Ma ngkai, e a rin angia nakon aia mwakuri ae boou. E taekinna Ethel Bennecoff bwa a a waaki Taan Reirei n te Baibara “ma te ingainga ao te tangira ae bati riki i [nanoia] nakon are mai mwaina.” E kitana te bwabwaro Odessa Tuck ae 18 ana ririki n te tai anne, ao e kamatoaa nanona bwa e na butimwaea te wewete are “Antai ae e na nako?” E taku neiei: “I aki ataia bwa tera, te nakea, ao ni kangaa. Ma te bwai ae I ataia bwa I kani katotonga Itaia, are kangai: ‘Aio ngai! Kanakoai!’ ” (Ita. 6:⁠8) E taku Ralph Leffler: “Te bong ane rangi n okoro anne, e moanaki raoi iai te mwakuri ae korakora ae tataekinan te Tautaeka n Uea, ae e a kabutaa te aonnaba ngkai.”

Maroaka ae te bwabwaro are i Cedar Point i Ohio n 1922, e a riki bwa te tai ae rangi ni kakawaki n rongorongoni baika riki n ana botaki Iehova! E taku George Gangas: “Te bwabwaro anne e kauekea nanou bwa N na kaakaei bwabwaro ni kabane.” Ao e uringnga bwa bon akea teuana ae e aki kaea. E korea aei Julia Wilcox: “I aki kona raoi ni kabwarabwaraa kukureiu ni katoa tai are e mwaneweaki iai n ara boki taekan Cedar Point n 1922. I kan tataekina aei, ‘Ko rabwa Iehova ngke ko kariaia bwa N na mena naba ikekei.’ ”

Ni boong aikai, ti boni bae n ururingi naba baika rangi ni kakawaki n te bwabwaro teuana ae kakukurei iroura, ao e kakorakoraa ingaingara ao tangiran Atuara ae kakannato, ma te Uea are e mwiokoia. Ngkana ti ururingi baikanne, ti kairaki naba iai bwa ti na kangai: “Ko rabwa Iehova ngke ko kariaia bwa N na mena naba ikekei.”