Ko Ataia?

E kangaa n uouotaki te ai n taai ake rimoa?

E TAEKINAKI te rongorongo n te Baibara ni Karikani Bwaai 22:6 bwa ngke e katauraoi ibukin te angakarea n te tabo ae raroa Aberaam, e “anaa aian te karea ni kabuekaki . . . ao e katokaa i aon Itaaka are natina. Ao e anaa te ai ma te biti ni baina ao a kaai n nako.”

E aki taekinaki n te Baibara aroia kaain rimoa ni kauraa te ai. Ni kaineti ngkanne ma te karaki aei, e kakoauaa temanna te tia kanakorongorongo bwa e taraa n ae e boni bae n aki ura te ai ni mwanangaia Aberaam ma Itaaka ane abwabwaki anne. Ngaia are tao e nanonaki iai bwaini kauraan te ai.

A iangoia tabemwaang bwa n taai ake rimoa, e boni kangaanga kauraan te ai. E bebete riki irouia aomata anaakin mwaakaron te ai mairouia kaain rarikia nakon are a na kataia ni kauraa te ai. Ngaia are a bati taan rabakau aika kakoauaa bwa te bwai are e uouotia Aberaam bon te kaatibu ae tao e kanoaaki n taiani mwaakaro ake a anaaki man te ai ae ura n te tairiki are mai mwaina. (Ita. 30:14) Ngkana a uouotaki n aron anne mwaakaro, e a kai kabonganaaki ma te aia ibukini kauraan te ai n tain te mwananga ae abwabwaki.