Titiraki Mairouia Taani Wareware
E aera bwa a kauntaekaa te tebobai taani kairiribai nakon Iesu?
Aio teuana mai buakon aia kauntaeka aika bati taani kairiribai nakon Iesu are a tiribureia iai ma taan rimwina. Iai tuua aika bati n te Tua Rinanoni Mote ibukin te taromauri ae itiaki ni kaineti ma baika waanako man te rabwata, te rebera, ao rabwataia aomata ma maan aika mate. Iai naba kaetieti ibukini kaitiakani baika kamwara. E kona ni karaoaki aei n te angakarea, te kaitiaki, ke te katimtim.—NakIbo. mwa. 11-15; WarIte. mwa. 19.
A kabwarabwarai tuua aikai n te aro ae rangi n riao taan reirei ake a kakannato aika I-Iutaia. E taekinaki n te boki teuana bukin rikin te kamwara n aekana nako are e a karioi “titiraki ni kaineti ma baika riki bwa a kangaa n riki, e kangaa n ewewe nakoia tabemwaang ao tera aroni butinakona, bwainnamwarake ao bwaai aika kona ni kamwara ao aika aki, ao kabaneana te kabanemwane ma waaki ake a riai ni karaoaki ibukin te kaitiaki.”
A titirakina Iesu taani kairiribai ni kangai: “A aera taan rimwim ngkai a aki ira aia katei mwaane ake ngkoangkoa, ngkai a amwarake ao a tuai ni katiakii baia?” (Mareko 7:5) A bon aki taekina tuan te kakaitiaki taani kairiribai man Aaro akanne. N aron te katei, a tangiria taan reirei aika kakannato bwa e na kabwaroaki te ran i aoni baia imwain amwarakeia. E reitaki ni kangai n te boki are mwaneweaki mai eta: “E kauntaekaaki naba bwa boora raa aika a na kabonganaaki ibukini kabwaroan te ran, te ran raa ae raoiroi, antai ae e na kabwaroa te ran, ao abwakira te bai n tebo i nanon te ran.”
E teretere aron Iesu nakon aia tua nako aomata aikai. E tuangia mataniwi n Aaro aika I-Iutaia ake n te moan tienture ni kangai: “E eti ana taeka Itaia ngke e taetae ni burabetina taekami, ngkami aika taani mwamwanaa te aba, n aron ae koreaki ni kangai, ‘A karineai aomata aikai n riaia, ma e rangi n raroa nanoia mairou [ngai ae Iehova]. Akea bongan taromauriau irouia, bwa a tataekin aia tua aomata bwa aia taeka n reirei.’ Kam kakeaa ana tua te Atua ngkai kam taui aia katei aomata.”—Mareko 7:6-8.