Antai ae karika te Atua?

Kataamneia te karo ae e kataetaea natina te mwaane ae itiua ana ririki. E taku: “Rimoa, rimoa, ao e karaoa te aonnaba te Atua ao bwaai ni kabane i nanona, n ikotaki naba ma taai, namwakaina ao itoi.” E iangoa anne te teinimwaane aei i nanon tabeua te miniti ao imwina e titiraki ni kangai: “Bwabwa, antai ae karika te Atua?”

E kaeka Tamana ni kangai: “Akea ae karika te Atua. Ai kaman iai ngaia mangkoangkoa ao akea moan rikina.” E rau nanon te ataei aei n te kaeka ane e bebete anne tii n te tai anne. Ma ngke e a ikawai riki, e teimatoa ni kiriuriu nanona n te titiraki anne. E namakinna bwa e kangaanga otana ngkai iai temanna ae akea moan rikina. Eng, bon iai ae karika naba te iuniweeti. E iango te ataei aei ni kangai: ‘E roko mai ia te Atua?’

Tera kaekaan anne n te Baibara? N etina, bon titeboo raoi ma are e taekinna te tama are n ara katoto. E korea ae kangai Mote: “Te Uea . . . Ngke a tuai ni bungiaki maunga, Ngke Ko tuai ni karika aonaba ma aontano, Ao bon te Atua Ngkoe mangkoangkoa ao n aki totoki.” (Taian Areru 90:1, 2, BG) N aron naba anne, e taku te burabeti ae Itaia: “Ko aki ataia? Ko aki ongo? Iawe bon te Atua ae akea tokina, e karika aonaba ni kabanea”! (Itaia 40:28, BK) N aron anne, e taekinaki n ana reta Iuta bwa iai te Atua “mangkoangkoa.”​—Iuta 25.

E kaotaki nakoira ni kiibu akanne bwa te Atua bon “te Uea ae akea tokina” n aroni kabwarabwaraana iroun te abotoro Bauro. (1 Timoteo 1:17) E nanonaki n aei bwa e a kaman iai mangkoangkoa ao akea moan rikina, n aki ongea noran raroan te tai anne. Ao e na bon teimatoa n iai ngaia n taai aika a na roko. (Te Kaotioti 1:8) Mangaia are bon te koaua ae moan te kakawaki bwa e maiu n aki totoki Teuare Moan te Mwaaka.

Bukin tera bwa e kangaanga otara n te iango aei? Ibukini kimototoni maiura, e rangi ni kaokoro iangoan te tai iroura ma are e iangoia Iehova. Ibukina bwa akea moan rikin te Atua ma tokina, titeboo ngkanne te bong ae tebongina irouna ma ririki aika tenga. (2 Betero 3:8) E kangai kamatataana: E kona te man ae te taake ae maiu ae ikawai tii i nanon tao 50 te bong n ota n abwakini maiura ae 70-80 te ririki? E bon aki! Ma e ngae n anne, e kabwarabwaraaki n te Baibara bwa titeboo ngaira ma taian taake ngkana ti kabotaunariaki ma ara tia Karikiriki ae Kakannato. E taraa n tianaki riki ara konabwai n iango ngkana e kabotaunariaki ma ana konabwai. (Itaia 40:22; 55:8, 9) Ai ngaia are e aki kamimi ngkai iai iteran aroaron Iehova aika a aki kona n ota raoi iai aomata.

E ngae ngke e kona ni kangaanga otara n rongorongon te Atua ae akea moan rikina ma tokina, ma ti kona n ataia bwa e tonu raoi. Ngkana iai temanna ae e a tia ni karika te Atua, ai bon te tia Karikiriki te aomata anne. Ma n aron ae e kabwarabwaraaki n te Baibara, bon Iehova ae “karikii bwaai ni kabane.” (Te Kaotioti 4:11) Irarikin anne, ti ataia bwa bon akea ngkoa te iuniweeti. (Karikani Bwaai 1:1, 2) E riki ngkanne mai ia? E riai n riki moa te tia Karikia. E bon riki imwaini karikaia aomata aika wanawana, n aron Natina ae ana rikitemanna ao anera. (Iobi 38:4, 7; I-Korote 1:15) E teretere raoi ngkanne bwa bon tii ngaia n riki n te moantai. E bon aki kona ni karikaki ao bon akea te bwai ae riki are e kona ni karika te Atua.

E kakoauaaki rikin te Atua ae akea moana ma tokina n rikira ao te iuniweeti ni kabane. E boni bae n iai mangkoangkoa Teuare e karika ara iuniweeti ae totoakaei, ae Teuare e katei tuua ibukin tauan arona. Bon tii ngaia ae kona ngkanne ni karina te ikeike ni maiu i nanoni bwaai ni kabane.​—Iobi 33:4.