Au Motinnano Ngke te Teei Ngai

Ai tibwa tebwina au ririki n 1985 ngke a a roko ataei mai Cambodia n te reirei are I reirei iai i Columbus, Ohio, U.S.A. E atai tabeua taeka n te taetae n Ingiriti temanna mai buakoia ataeinimwaane akanne. E kabonganai taian taamnei ngke e karakina te karawawataaki ae korakora ae kakamaaku, te tiritiri ao birinakoia aomata n rawei maiuia. I bon tang n tairiki tabeua ngkana I iaiangoi aroia ataei aikai. I kan tuangia taekan te kantaninga ibukin te Bwaretaiti ao te mangauti, ma a aki ota n au taetae. E ngae ngke I rangi n uarereke, ma I bon iangoia bwa N na reireinai te taetae ni Cambodia bwa I aonga ni kona tuangia raou n reirei taekan Iehova. E karako ataakina irou ae a kona ni kanakoraoaki baika N na karaoi n taai ake imwaiu man au motinnano aei.

E kangaanga reiakinan te taetae ni Cambodia. Uoua te tai are e bwara iai nanou ma e kaungaai Iehova rinanoia au karo. Imwin tabeua te tai, a a kaumakai au tia reirei ma raou n reirei bwa N na uaiakina nakoau ae bubura te boo iai. Ma I boni kani bwaiania, ao I rinei bwaai tabeua n te reirei ae rietata ake N na reiakin ibukini karekean au mwakuri ni kareketianti ae N na itera n tai iai bwa I aonga n roko n tiau. Imwin aoan te reirei, I taneiai ni boraraoi ma bwaiania tabeman ao n toa ma ngaiia n te mwakuri ni minita. I anga naba nanou bwa N na riki bwa te tia reirei irouia ataei ake a reiakina te taetae n Ingiriti irarikin oin aia taetae ao bon te motinnano ae e korakora iai buokau rimwi riki.

Ngke ai 16 au ririki ao I ongo ae iai te kurubu n te taetae ni Cambodia i Long Beach, i California, U.S.A. I bon nako ikanne ao n reiakina warekan te taetae ni Cambodia. N te tai ae waekoa imwini banen au reirei, I a bwaiania ao n teimatoa n uarongorongo nakoia kaaini Cambodia ake a uakaan ma au auti. Ao ngke e a koro 18 au ririki, I a iangoia bwa N na mwaing nako Cambodia. E bon teimatoa naba n ataaki bwa e karuanikai te tabo aei, ma I ataia ae a a tia n ongora te rongorongo ae raoiroi ae taekan te Tautaeka n Uea tabeman mai buakoia aomata aika tebwina te mirion ake a maeka iai. Bon tii teuana te ekaretia ae 13 taan uarongorongo iai i aon te aba anne n taai akanne. I moan roko i Cambodia ngke 19 au ririki. Uoua te ririki imwina, I a motinnanoia bwa N nangi nako ni maeka iai. E a reke au mwakuri ae te raitaeka ao te angareirei n te taetae n Ingiriti are I a itera n tai iai ao I a kona ni boutokaa au mwakuri ni minita. Imwin tabeua te tai, e a reke kaainnabau are e a uataboa tiau i nanoni maiura. Ti kaai ni kukurei ni buokiia kaain Cambodia aika bati bwa a na katabui maiuia nakon te Atua.

E a bon tia Iehova n anganai baike ‘e tangiri nanou.’ (Taian Areru 37:​4, BG) Te mwakuri ae te kabanea ni kakukurei i buakoni mwakuri nako boni karekeaia taani rimwini Kristo. Inanon 16 te ririki n tiku i Cambodia, e a rikirake te kurubu ae uarereke ae kaainaki ngkoa irouia ana toro Iehova aika 13 mwaitiia nakon ekaretia aika 12 mwaitiia ao kurubu aika 4 aika raroanako!​—⁠Ana rongorongo Jason Blackwell.