E aki mwanuokinai Iehova

AROU RIMOA:

: I bungiaki n te kaawa ae a maiu raoi kaaina ae Bilbao i Tibein meang. Boni ngaira aman aine n ara utu ao ngai te kauoman. A rangi ni matoatoa ara utu n te Aro ni Katorika ao I katoabong n irira te Tutia. Ngke ai 23 au ririki, I a riki bwa te tia reirei ae te mwakuri ae I tangiria ao n tia ni beku iai i nanon 40 te ririki. Mai buakoni baike a reireinaki iai ataei, I rangi ni kimwareirei n reireinia taekan te Aro ni Katorika ao n te tairiki I beku bwa te tia reirei ibukin aia moani komonio ataeinnaine.

Imwin tekatekau n taanga imwin au mare ae kakukurei i nanon 12 te ririki, e mate kaainnabau ao I a tiku ma natiu aine aika aman ake I riai n tararuaia. Ai bon tibwa 33 au ririki n te tai anne! I kataia n ukera kabebetean nanou man au onimaki ni Katorika, ma bon iai naba titiraki aika a teimatoa n okioki n au iango. I bon iango ao I taku: ‘E aera ngkai a teimatoa ni mamate aomata ngkai e a tia ni kamaiuira Iesu? E aera ngkai ti tataro bwa e na roko Ana Tautaeka n Uea te Atua ngkana ngaia bwa a na nako karawa aomata aika raoiroi?’ Ma ae kakawaki riki, I iango ni kangai: ‘Ngkana ngaia bwa e motiki taekara te Atua ngkana ti mate, e aera ngkanne bwa imwina riki ao ti riai ni kitana karawa, te burikatorio ke moone ibukin te kabanea ni motikitaeka?’

I tabeki titiraki akanne nakoia mitinare tabeman ake I kaitiboo ma ngaiia. Aio ana kaeka temanna mai buakoia: “I aki ataia. Titirakina te ebikobo. E aera bwa ko tabeaianga iai? Tiaki ko bon onimakina te Atua? Tai katabeaiangako n titiraki akanne!” Ma I bon teimatoa naba n ukeri kaekaaia. Imwina riki, I a irii reirei man Aaro aika te Jesuits, Pentecostals, ao te Gnostics, ma bon akea naba temanna ae kaekai au titiraki aikai n te aro ae na rau nanou iai.

ARONI BITAKINI MAIU MAN TE BAIBARA:

Ngke ai 60 tabun au ririki, I a kaoaki iroun ataein te reirei ae itiua ana ririki bwa N na ira aia botaki Ana Tia Kakoaua Iehova. I kukurei ni baike I nori ao n ongoraei, ma ibukina bwa I rangi n tatabetabe, I aikoa manga roroko i buakoia taani Kakoaua n taai akanne. Uoua te ririki imwina, a a karebwerebwe n au mataroa taangan Juan ma Maite aika taani Kakoaua. Inanon tenua te namwakaina, ti maroroakin titiraki aika rangi n nano ma kaekaaia ao n tokina e a anaaki nanou bwa N na reirei n te Baibara.

E korakora ingaingan nanou nakon au tai n reirei ni kabane! I neneri raoi bwaai ni kabane i nanoni Baibara aika tenua ake a a tia n rairaki, bwa N na kakoauaa raoi bwa e eti aia angareirei Ana Tia Kakoaua Iehova. N te tai ae waekoa, I a ataia bwa e a tia ni mangaongao otau n taekan te Aro i nanon ririki aika rangi ni bati. I rangi n tabeaianga ngke I a ataia bwa e rangi ni bati kaokoron au koaua ngkekei ma baika I a tabe n reiakin man te Baibara. I rangi ni mimi bwa titeboo au onimaki ma te kai ae rangi n nene wakaana ma e a koutaki mai oina.

Imwin anne, e a kakaiaki aorakin au kauaei ao e mate. I ritaea naba n te tai anne man au mwakuri ao I a kitana Bilbao i nanon tabeua te tai. A boni mwaing nako naba Juan ma Maite. I nanokawaki bwa I a aki waakinaanako au reirei n te Baibara. Ma e ngae n anne, I rangi n namakinna bwa e a tia n reke irou te bwai ae kakawaki. N na bon aki mwanuokinna.

Tao uabwi te ririki imwina ngke ai 82 au ririki, a a manga okira Bilbao Juan ma Maite ao a a kawarai. Ai kukureira ngai ngke I a manga noria! I ataia bwa e tuai mwanuokinai Iehova ao I a manga moana au reirei n te Baibara. A rangi n taotaona nanoia nakoiu Juan ma Maite bwa a a bon okioki naba au titiraki. I kan okioki n ongoraei kaekaan au titiraki man te Baibara bwa e aonga n toki tangiran au koaua are mai mwaina. I tangiria naba bwa N na taubobonga raoi ni kabwarabwarai koaua man te Baibara nakoia raoraou ao au utu.

N tokina, I a bwabetitoaki n tain aia runga Ana Tia Kakoaua Iehova ngke ai 87 au ririki ao e riki te bong anne bwa te tai ae te kabanea ni kakukurei ni maiu. E karaoa te kabwarabwara ae boto man te Baibara te unimwaane ae te Kristian ae kaineti raoi nakoira ake ti nang bwabetitoaki. A a tiinako rannimatau n te kabwarabwara anne. I kakauongo iai kaanga aron ae e bon taetae Iehova nakoiu. Ngke I a tia ni bwabetitoaki, a rangi ni bati taani Kakoaua ake a kawarai ao ni kamaurai, e ngae naba ngke angiia mai buakoia a tuai kaitiboo ma ngai mai mwaina!

AROU NI KAKABWAIAAKI:

I ataia n taai nako bwa Iesu Kristo bon “te kawai.” (Ioane 14:6) Ma I a moanna ni kinaa Iehova n au reirei man te Baibara ao e kairira Iesu nakoina. I a kona ngkai n tataro nakon te Atua n aron Tamau ae I tatangiria ao Raoraou. E a bitaki maiu mani warekan te boki ae Kaaniko Riki ma Iehova.a I moani warekia mai moana ni karokoa banena n tii teuana te tairiki! E rangi n rotaki nanou n ataakin aron ana nanoanga ni koaua Iehova nakoira.

Ngkana I tanrikaaki n uringa maanin au tai n ukoukora te koaua ibukin te Aro, I bon iaiangoi ana taeka Iesu aikai: “Teimatoa ni bubutii ao kam na anganaki. Teimatoa n ukeuke ao kam na kunea. Teimatoa ni karebwerebwe ao e na kaukaki nakoimi.” (Mataio 7:7) I a tia ni karekei ngkai kaekaan titiraki ake I ingainga ngkoa ni kan atai ao I a namakina te kimwareirei ae bati n tibwaakina nakoia aomata.

Ngke ai 90 au ririki, a boni bati naba bwaai aika I riai n reiakin ibukin Iehova. Bon te tai ae okoro irirakini bobotaki n te Tabo n Taromauri ibukina bwa I karerekea iai te atatai ae kakawaki ao I bobotaki naba ma tariu ao mwaaneu aika tangiraki irou. I rangi ni kan riki bwa te tia reirei naba n te aonnaba ae Bwaretaiti are beritanaki. (Te Kaotioti 21:3, 4) Ao ai moarara riki, I ingainga ni kan noria aomata aika tangiraki irou ake a a tia ni mate bwa a na manga maiu ao n reke naba au tai n reireinia koaua man te Baibara. (Mwakuri 24:15) Ai korakorara ingaingan nanou ni kani kabwarabwaraa nakoia te bwaintituaraoi ae anganai Iehova ngkai I a kara!