Kaain te Rabwata n Tautaeka ae Boou

E katanoataaki n ingabongin te Katenibong n Tebetembwa 5, 2012 nakoia kaain te utu ni Betaera n te United States ao Kanata, bwa iai kaain te Rabwata n Tautaeka ae Boou ibukia Ana Tia Kakoaua Iehova. E moana ana beku anne Mark Sanderson man Tebetembwa 1, 2012.

E kaikawaaki Brother Sanderson i San Diego i California, n te U.S.A irouia ana karo aika Kristian ao e bwabetitoaki ni Beberuare 9, 1975. E moana ana beku bwa te bwaiania i Saskatchewan i aoni Kanata n Tebetembwa 1, 1983. E angabeeba n Ritembwa 1990 n te United States n te kaitiua ni Kuura Ibukini Kataneiaakia Minita (ae e aranaki ngkai bwa te Kuura n Reirei n te Baibara Ibukia Taari Mwaane Aika Akea Buuia). E rineaki Brother Sanderson bwa te special bwaiania n Eberi 1991 n atimwakoroni Kanata ae Newfoundland. Imwin ana beku bwa te bonomwi ni mataniwi n te aono ae uarereke, e a kaoaki bwa e na kaaina te utu ni Betaera i Kanata ni Beberuare 1997. E kamwaingaki n Nobembwa 2000 nakon te aobiti n tararua n te United States ao ni mwakuri n te Aobiti ae Tabe ma Mwakuri ni Kuakua ao imwina n te Aobiti Ibukin te Mwakuri.

E kaea te Kuura ibukin te Komete n Tararua n Aia Aobiti Ana Tia Kakoaua Iehova Brother Sanderson n Tebetembwa 2008 ao imwina e a rineaki bwa kaain te Komete n Tararua n te Aobiti i Biribin. E a manga kaoaki n Tebetembwa 2010 bwa e na okira te United States ike e a riki iai bwa te tia ibuobuoki n te Komete Ibukin te Mwakuri n te Rabwata n Tautaeka.