Ti Riai n Titirakina te Atua?

A TAEKINNA tabeman bwa e kairua ae ti na titirakina te Atua. Tao a namakinna bwa e aki karineaki iai te Atua ngkana e titirakinaki, bwa e aera ngkai e kariaia bwaai tabeua ao e aki ake tabeua. Anne naba ae ko iangoia?

Ngkana ngaia anne, ko bae ni mimi n ataakin ae a bati aomata aika raoiroi ake a a tia n titirakina te Atua. Nori katoto ni kaineti ma titiraki ake a tabekaki nakoina.

Ana titiraki te mwaane ae kakaonimaki are Iobi: “A aera ngkai a maiu akana buakaka, Ma n riki n unimwane, ma n riki ni bati ni korakora?”​—Iobi 21:7, BG.

Ana titiraki te burabeti ae kakaonimaki are Abakuka: “Bukin tera ngkai Ko taraiia akana mamakuri ni mamana te aba, ma ni kainababu ngkana e oonga te aomata ae raoiroi riki nako ina te aomata ae buakaka?”​—Abakuka 1:13, BG.

Ana titiraki Iesu Kristo: “Atuau, Atuau, e aera ngkai ko a kitanai?”​—Mataio 27:46.

Ngkana ko wareki rongorongo akana i rarikini kiibu akana mwaneweaki, ane ko na noria bwa e aki kaotaki iai bwa e un Iehovaa ae te Atua n aeka n titiraki akanne aika a nako man te nano. Ni koauana, ti bon aki kubanako ngkai e kariaia aei. N te katoto, e bon aki un te Atua ngkana ti bubutiia baika ti kainnanoi ibukin teimatoani marurungira. E kukurei n anganira baike ti kainnanoi. (Mataio 6:11, 33) N aron anne, e tauraoi n anganira rongorongo ake a kona ni kateimatoaaki iai marurungin ara iango ao nanora. (I-Biribi 4:6, 7) Ni koauana, e taekina ae kangai Iesu nakoia taan rimwina: “Teimatoa ni bubutii ao kam na anganaki.” (Mataio 7:7) E kaotaki n te rongorongo are e beritanna Iesu bwa e aki tii taekina karekeani bwaikorakin te maiu aei, ma e boni kaekai naba titiraki aika kakawaki.

Ngkana arona bwa e reke am tai n titirakina te Atua, e nga mai buakon titiraki aikai ae ko na tabekia?

● Iai manenani maiu?

● Tera ae na riki nakoiu ngkana I mate?

● E aera ngkai ko aki katoka rawawatau?

Kioina ngkai e “kairaki korean te Koroboki ae Tabu ni kabane iroun te Atua,” ko na boni karekei kaekaaia ake n ana Taeka te Atua ae te Baibara. (2 Timoteo 3:16) Iangoi bwaai aika uoua ake a kairiia tabeman bwa a na karaoia ae tabekan titiraki akana karinanaki mai eta ao kaekaaia man te Baibara.

[Kabwarabwara mai nano]