3 E Irantanga te Atua e Koaua Anne?
Tao ko a tia n ongongo aei: “E kawakin aia bure nako aomata te Atua ao ni kabooi mwia ni katuuaaeia n te ai ni moone n aki toki.”
“E katuuaaeia taani bure te Atua ni kabuanibwai aika karina i aon te aonnaba.”
Ana reirei te Baibara: E taekinaki n 2 Betero 3:9 bwa e “aki tangira kamaunaan temanna [Iehova] ma e tangiriia aomata nako bwa a na rairi nanoia.” E aki kaatuua iangoan ara kairua te Atua, ma e kaatuua riki iangoan raoiroira. A “biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.”—2 Rongorongo 16:9, BG.
Tiaki te reirei man te Baibara te ai ni moone ae iangoan te katuuaa ae iowawa n aki toki, bwa bon te bwai ae rangi n ribaaki iroun te Atua. Te katuuaa ae te kabanea ni korakora ibukia akana buakaka bon te mate. (Ieremia 7:31; I-Rom 6:7) Tiaki naba ana mwakuri te Atua kabuanibwai aika karina ike a a mate iai aomata nako n aki ongei aroia, ma bon tii baika a karina n riiriki nakoia.—Te Minita 9:11.
Buokam n ataan te koaua: Ti kukurei ni kaania riki te Atua ngkana ti ataia bwa e “kani kabara buure” ao e iremwe ni kabuakaka. (Taian Areru 86:5, BG) Ti aki kani beku iroun te Atua ibukin raraomara n ara bure ke maakan te katuuaaeaki. N oneani mwin anne, ti kona ni karikirakei ara onimaki i aon te bwai ae moanibaan te raoiroi ae tangiran Iehova. E na riki te tangira anne, bwa te bwai ni kaungaunga nakoira are e na kairira nakoni karaoan ara kabanea ni kona ni kakukureia te Atua.—Mataio 22:36-38; 1 Ioane 5:3.
E ngae ngke e tangiriia aomata nako te Atua bwa a na bitii maiuia nakon ae raoiroi, ma e ataia naba bwa a bati aika a na aki karaoa anne. Ngkana e aki katuuaaeia akana a motinnanoia bwa a na kakaraoa ae buakaka te Atua, e na titeboo ngkanne ma te tia tautaeka temanna are e katei ana tua ma e aki kakoroi bukia ni katuuaaeia taani bure. E na akea naba iai te kaetitaeka ae riai ao e na rikirake te rawawata n aki toki. (Te Minita 8:11) E anganira te kantaninga ae nene te Atua ibukin taai aika a na roko, n ataakin ae e na aki kariaia waakinakon te buakaka n aki toki. E beritanna te Atua bwa e na kamaunaia akana teimatoa n aia mwakuri aika buakaka, bwa e aonga n reke te maiu are aki toki are ana moani kantaninga ibukia “akana nimamanei.”—Taian Areru 37:10, 11, 29 BG.a
[Kabwarabwara ae nano]
a Ibukin reiakinan riki aron te Atua ni karaoa te aonnaba aei bwa te bwaretaiti, nora mwakoro 3 ao 8 n te boki ae Tera Ana Reirei ni Koaua te Baibara?
[Kabwarabwaraan n iteraniba 6]
E tangirira te Atua bwa ti na taromauria ibukini maakani katuuaaeara?
[Picture Credit Line n iteraniba 6]
Engravings by Doré