Karekea Reireiam Man Ana Taeka Te Atua

Ko na Kanga ni Kaaniko ma te Atua?

A tabekaki titiraki n te kaongora aei ake tao ko a tia n titiraki naba iai ao ni kaotii taabo ake ko kona ni wareki iai kaekaaia n am Baibara. A na kukurei Ana Tia Kakoaua Iehova ni maroroakini kaekaaia ma ngkoe.

1. E ongoraei tataro ni kabane te Atua?

E kaoia aomata Iehova man natannaomata nako bwa a na kaania n te tataro. (Taian Areru 65:2) Ma e aki ongoraei tataro ni kabane. N te katoto, ngke a teimatoa ni karaoa ae buakaka I-Iteraera, ao e rawa te Atua n ongoraei aia tataro. (Itaia 1:15) E kona naba n tutukaki ana tataro te mwaane ae iowawa nakoni buuna. (1 Betero 3:7) Ma e ngae n anne, e na bon ongoraei aia tataro aomata aika bure rawawata te Atua ngkana a rairi nanoia.—Wareka 2 Rongorongo 33:9-13.

2. Ti na kanga n tataro?

Bon te kakabwaia nakoira te kona n tataro nakon te Atua ao bon teuana naba iteran ara taromauri, ngaia are ti riai n tataro nakon Iehova n tii ngaia. (Mataio 4:10; 6:9) Kioina ngkai ti aki kororaoi, ti riai n tataro i nanon aran Iesu ibukina bwa boni ngaia “te kawai” ae rineaki. (Ioane 14:6) E aki tangirira Iehova bwa ti na kaokiokii tataro ake a a matenikuna ke a koreaki taekaia, ma ti na tataro mai nanora.—Wareka Mataio 6:7; I-Biribi 4:6, 7.

E kona naba ara tia Karikiriki n ongoraei tataro aika ti taekin i nanora n aki kanenei bwanaara. (1 Tamuera 1:12, 13) E kaungaira bwa ti na tataro n taai nako, n aron ae n te moaningabong ao n te tairiki, n tain te amwarake, ao ngkana ti kaaitara ma kangaanga.—Wareka Taian Areru 55:22; Mataio 15:36.

3. E aera ngkai a bobotaki Kristian?

E aki bebete kaanian te Atua ibukina bwa ti maeka i buakoia aomata aika e karako onimakinan te Atua irouia ao a kakanikoa ana berita ibukin te rau i aon te aba. (2 Timoteo 3:1, 4; 2 Betero 3:3, 13) Mangaia are ti riai ni bobotaki ma raora n te onimaki ibukin te kaungaunga.—Wareka I-Ebera 10:24, 25.

Ko kona ni kaaniko ma te Atua ngkana ko iraorao ma aomata aika a tangira te Atua. E kona n reke te kakabwaia n aia botaki Ana Tia Kakoaua Iehova man noran aia onimaki aomata riki tabeman.—Wareka I-Rom 1:11, 12.

4. Ko na kanga ni kaaniko ma te Atua?

Ko kona ni kaaniko ma Iehova man iaiangoan raoi te bwai are ko a tia n reiakinna man ana Taeka. Iaiangoi ana mwakuri, ana kairiri, ao ai ana berita nako. E kona ni karikirakeaki te kakaitau ni koaua ibukin ana tangira te Atua ao wanawanana, ni kananoan raoi te iango ae raonaki n te tataro.—Wareka Iotua 1:8; Taian Areru 1:1-3.

Ko kona ni kaaniko ma te Atua tii ngkana ko mwiokoia ao ko onimakinna. Ma te onimaki kaanga ai aron te bwai ae maiu ae kainnanoa kateimatoaana. Ko riai ni wantongaa am onimaki n taai nako man kauringaan raoi te bwai are ko a tia n reiakinna.—Wareka 1 I-Tetaronike 5:21; I-Ebera 11:1, 6.

5. Ko na kanga ni kakabwaiaaki ni kaanian te Atua?

E tabeakinia Iehova te koraki aika a tangiria. E kamanoia mani baike a na kona n urui aia onimaki ma kantaningaan te maiu ae aki toki irouia. (Taian Areru 91:1, 2, 7-10) E anganira te kauring ni kaineti ma waaki ni maiu ake a urui marurungira ao kukureira. E reireinira Iehova te kawai ae te kabanea n tamaroa ibukini waakini maiura.—Wareka Taian Areru 73:27, 28; Iakobo 4:4, 8.

Ibukin rongorongona riki, nora mwakoro 17 n te boki aei, ae boreetiaki irouia Ana Tia Kakoaua Iehova.

Tera Ana Reirei ni Koaua Te Baibara?, published by Jehovah’s Witnesses.