Antai Raoi Iesu Kristo?

E AERA ngke e karika te kiriwe rokon Iesu Kristoa i Ierutarem ni moan iteran te ririki ae 33 C.E.? A bati aomata n te kaawa ake a tia n ongo taekan Iesu ao baika kamimi ake e a tia ni karaoi. A teimatoa ni kaotiota taekana nakoia aomata. (Ioane 12:17-​19) Ma akea mai buakon te koraki anne ae e ataia bwa e a mena i buakoia te aomata are e nangi butanako ni katobibia te aonnaba ana kairiri are e moa man tienture ake ngkoa ni karokoa ngkai!

Iangoi katoto tabeua n rongorongoia aomata ake a korakora rotakini maiuia n ana kairiri Iesu.

• E boto karaoan te karenta ae taabangaki kabonganaana n aba aika bati n te aonnaba man te tai are e iangoaki bwa e bungiaki iai Iesu.

• A atongia bwa Kristian aomata aika tao uoua te birion mwaitiia ae tao katenimwakoroni mwaitin te botannaomata n te aonnaba.

• A reireinia aomata kaain te Aro ae te Mutirim ae raka i aon te birion kaaina bwa Iesu bon “te burabeti ae kakannato riki nakon Aberaam, Noa, ao Mote.”

• A bati ana taeka Iesu aika kaotiota wanawanana n aanga aika kakaokoro aika taabangaki kamanenaia. Aikai tabeua mai buakoia:

  “Anganna naba tabam are teuana.”​—MATAIO 5:39.

  “Iria uoua te kiromita.”​—MATAIO 5:41.

  “Akea ae kona n toro irouia tooka aika uoman.”​—MATAIO 6:24.

  ‘Tai kaaki moomin te bwaeao i mataia beeki.’​—MATAIO 7:6.

  “Bwaai ni kabane aika kam tangiriia aomata bwa a na karaoi nakoimi, kam riai ni karaoi naba nakoia.”​—MATAIO 7:12.

  “Warebwaia te kabanemwane.”​—RUKA 14:28.

Akea te nanououa bwa e a tia Iesu ni kairiia aomata aika bati. Ma e ngae n anne, a boni kakaokoro aia iango aomata ao aia koaua ibukin Iesu. Ai ngaia are ko kona n iangoia bwa ‘Antai Raoi Iesu Kristo?’ Tii te Baibara ae ti kona ni karekea iai ataakin te tabo are e roko mai iai Iesu, aroni maiuna, ao bukini matena. E kona n rangi rotaki maium ngkai ao n taai aika a na roko n ataakini koaua akanne.