Tera te Rongorongo ae Raoiroi?
“Te rongorongo ae raoiroi aei. . .”—MATAIO 24:14.
A RIAI Kristian n tataekina te “rongorongo [aei] ae raoiroi ibukin te tautaeka n uea,” n tuangakia aomata nako taekana ao ni kabwarabwaraa ae te Tautaeka n Uea anne bon te tautaeka ae e na tautaekana te aonnaba n te raoiroi n taai aika imwaira. Ma e ngae n anne, e kamanenaaki naba te taeka ae “rongorongo ae raoiroi” n aanga riki tabeua n te Baibara. N te katoto, e kuneaki taekani “kamaiuan te aba” n (Taian Areru 96:2, BG), “te rongorongo ae raoiroi ibukin te Atua” n (I-Rom 15:16), ao “te rongorongo ae raoiroi ibukin Iesu Kristo.”—Mareko 1:1.
E teretere raoi ngkanne bwa e irekereke te rongorongo ae raoiroi ma koaua nako ake e taekin Iesu ao ake a korei taan rimwina. Imwain rieraken Iesu nako karawa ao e tuangia taan rimwina ni kangai: “Mangaia are naako, reireinia aomata mai buakoia botannaomata nako bwa a na riki bwa taan rimwiu ao bwabetitoiia n aran te Tama, ao te Nati, ao te taamnei ae raoiroi. Ao reireinia bwa a na kakairi ni bwaai ni kabane ake I tua nakoimi.” (Mataio 28:19, 20) Ngaia are aia mwakuri Kristian ni koaua bon tiaki tii kaongoaia aomata nako taekan te Tautaeka n Uea, ma a riai naba ni kakorakoraia ni karekeia taan rimwini Kristo.
Tera aroia Aaro ni kaineti ma aei? A bati aomata aika aki ota raoi bwa tera te Tautaeka n Uea, ai ngaia are a bon aki kona naba n reiakinia aomata taekana n te aro ae eti raoi. Ma a anga aia kabwarabwara i aon te kabwarabure ao onimakinan Iesu are a na kukurei n ongoraei aomata. A ukeri aanga n anai nanoia aomata ake a a rairaki man aia aaro rinanoni kamwengaraoaia ke katean onnaoraki, taabo n reirei, ao mwengaia aika maiu ni kainnano. E ngae ngke e rikirake mwaitiia aomata aika iriri n taromauri man aia kakorakora anne, ma a bon aki karekeaki Kristian ni koaua aika a na kekeiaki ni kaboraoi maiuia ma baike e reiakin Iesu.
E korea ae kangai temanna te tia rabakau i aon te Baibara: “Ane ko na kaitiboo ma taan rabakau n te Baibara tabeman, ke taani kairiri ni botaki ni Kristian aika a kakoauaa ae ti riai ni karekeia taan rimwini Kristo ke aika kan reiakina aroaron Iesu, ao n reireinia bwa a na karaoi bwaai ni kabane ake e taekin Iesu. . . . Ni koauana, a rangi ni mataata raoi ana kaetieti Iesu n aei. Ma ti bon aki karaoa are e taekinna. Ti aki kakorakoraira ni karaoia ma nanora ni koaua. Ao e teretere bwa ti aki ataa aroni karaoana.”
N aron anne, e kaotaki n aia kakaae Katorika n te United States bwa a kariaia 95 te katebubua ae e kainnanoaki tataekinan te rongorongo ae raoiroi n aia onimaki. Ma e ngae n anne, a iangoia angina bwa te anga ae te kabanea n tamaroa ni karaoan aei, e na aki tataekinaki ma a na kamanenai maiuia bwa banna ni katoto nakoia aomata. E kangai temanna mai buakoia ake a titirakinaki: “Maroroakinan te Rongorongo ae Raoiroi bon tiaki te anga ae te kabanea n tamaroa ibukin tataekinan te rongorongo ae raoiroi. Ma e iangoaki bwa e kakawaki riki katean te katoto ae raoiroi.” E taekinaki naba n te maekatin ae te U.S. Catholic, are e kaira te kakaae, bwa a bati ake a rawa ni maroroakin aia onimaki ibukin “rongorongon aia Aro ae buakaka ni karaoan te mwakuri ni bwaitingako n taai aika tibwa nako, ao ana angareirei te Aro ae irekereke ma kangaanga ao karawawata.”
E kaota nanokawakina te bishop man te Aro ae te Methodist n te tabo naba teuana, bwa a iraraure kaain ana Aaro ma ni mangaongao ao akea ninikoriaia ni waakinaanako mwiokoaia, ao titeboo aroaroni maiuia angiia kaain ana Aro ma ake i tinanikun ana Aro ao ngkanne bon tiaki te banna ni katoto ae raoiroi aroaroia. E titiraki ma te bwanaa ni bwarannano ni kangai: “Antai aika onimakinaki ibukin tataekinan euangkerion te Tautaeka n Uea?”
Akea ana kaeka te bishop aei ae e katauraoia ibukin ana titiraki. Ma bon iai kaekaana. Ko kona n noria n te kaongora ae imwina.
[Kabwarabwaraan n iteraniba 6]
Te rongorongo ae raoiroi bon taekan Ana Tautaeka n Uea te Atua ao te kakamaiu rinanon onimakinan Iesu Kristo