Eten E Koaua Bwa Moani Mwengaia Aomata?
IANGOIA bwa aongkoa ko mena n te onnaroka. Akea katabetabean am iango, akea te kakarongoa ae roko man te kaawa ae a mangaongao kaaina ae mena i tinanikun te oo. E totoakaei te onnaroka aei ao e rangi n rau. Ma te bwai ae tamaroa riki bon akea raraomam, akea kanikinaean te aoraki teuana iroum, te rabwarabwataki ke te maraki. Ko inaomata n taratarai, n aroki, n ringi, n ongoraei ao ni katoongi baika otabwaniniko.
Ko rangi ni kukurei n tarai uee aika kirimatamata man rangi ni kantara, imwina ko nora raaititin te karaanga ao ai aroka aika mawawa aika mwaitikurikuri ao uteute i aan te riringa ao nuuni kaai. Ko namakina ukakini kunim n te ang ae abebete ae kakianakoa te boiarara. Ko ongo kamwakaikaini baani kaai, bwarobwaron te ran i aoni bwaa, karongoaaia ma aia anene mannikiba, ao tangitangia maan aika bingingi aika mwakuri. Ngkana ko katea taamnein te baei n am iango, e aki ngkanne ingainga nanom ni kani mena n te tabo ae aekan anne?
A kakoauaa aomata ni katobibia te aonnaba bwa iai moan rikia aomata n te tabo ae aekan anne. I nanon tienture aika bati, a a tia kaain te Aro n Iutaia, Aaro ake aongkoa Kristian ngaiia ao te Aro ni Mutirim n reiakina taekan te onnaroka are Eten are e kamaekaia iai Atam ma Ewa te Atua. E rau mani kakukurei maiuia n aron ae taekinaki n te Baibara. A kaai ni maeka ma te rau ma maan ao te Atua naba, are e akoiia n angania te kantaninga bwa a na maiu n aki toki n te tabo are e rangi n tikauarerei arei.—Karikani Bwaai 2:15-24.
Iai naba aia iango ae kaokoro kaain te Aro n Hindu ibukin te bwaretaiti n taai ake ngkoa. A kakoauaa kaain te Aro ni Buddhist bwa a kaoti mataniwi n Aaro aika kakannato ke Buddhas, n taai aika raraoi ngke titeboo te aonnaba ma te bwaretaiti. Ao a reiakini karaki aika kuri n titeboo ma taekaia Atam ao Ewa Aaro aika rangi ni bati i Aberika.
Ni koauana, e rangi n taabangaki n aia koaua Aaro nako ma aia katei botannaomata te iango ibukin te bwaretaiti are rimoa. E taku te tia kororongorongo temanna: “A kakoauaa aomata aika bati bwa iai te bwaretaiti n rongorongon rimoa, are e noraki iai te kororaoi, te inaomata, te rau, te kakukurei, te amwarake ae bati, akean te karawawataaki, te tabeaianga, ao te itabarara. . . . E kauekeaki n te koaua aei te uringaaba ae korakora are a a rotaki iai aomata nako ibukini buan te bwaretaiti are a aki mwanuokinna, ike e a korakora iai tangirani manga kaokana.”
A kona ni boto karaki ao katei akanne ni kabane man te rongorongo teuana ae rangi n ataaki? E kona ni kairaki nanoia aomata n ururingan te bwai ae aki koaua? Bon iai te onnaroka are Eten ao Atam ma Ewa n taai aika bwakanako?
A kamangora te iango aei taani kananououa. A bati aika a katautaua bwa karaki aikai bon tii karaki ni kawai ao oto karaki, n taai aika a onimakinaki iai rabakaun aonnaba. E kamimi bwa a bane n iai aia Aro taani kananououai koauani bwaai. A bati mataniwi n Aaro aika a uataboa kakewean rongorongon Eten. A taku bwa akea mangkoa te tabo aei. A taku naba bwa bon tii te karaki, te kabotau, ke te oto karaki.
Ni koauana, iai n te Baibara taiani kabotau. E bon taekin naba kabotau aika mwaiti ake a rangi n ataaki Iesu. Ma e kaotaki n te Baibara rongorongon Eten bwa tiaki te kabotau ma bon rongorongon rimoa ae akea te nanokokoraki iai. Ma ngkana a tuai n riki baike a taekinaki n te Baibara, a na kanga ngkanne n onimakinaki nikirani kanoana? Ti na nenera bukin nanououaia tabeman n taekan te onnaroka are Eten ao n noria bwa a boto i aon te bwai ae koaua aia taeka ke a aki. Imwina, ti na maroroakinna bwa e aera ngkai e riai ni kakawaki nakoira n tatabemanira nako te rongorongo aei.