Bon Iai Kaaina​—Ma Antai?

E rinnako n te umwantabu temanna te unnaine i Eurobe ma te korona i baina ao e katorobubua ma te karinerine ae korakora i matan te bouannanti ae Maria. A kabwaroa te matoatoa i aon ruanimaten aia koraki ae karineaki te taanga teuana i Aberika. E aki mamatam te rorobuaka n ataei temanna i Amerika ao e kananoa ana iango ni kantaningaan ae na reke reitakina ma ana anera, are e kakoauaa bwa te tia kawakinna. Ao e kabueki beeba aika kirimatamata te ibonga temanna i Atia bwa e na angakarea nakon taamneia ana bakatibu.

Tera ae a uaia ni katiteuanaaki iai aomata aikai? A bane ni kakoauaa ae iai taamnei aika wanawana n te aba n taamnei ae e kona n reitaki te aba ma ngaiia ao iai aia konabwai n rotii maiuia aomata n te aro ae korakora. Ni koauana, e tataneiai te aba n te koaua aei ao e aki kamimi. Ma te bwai ae kamimi bwa a rangi ni bati iango aika kauntaba bwa antai aika maeka n te aba n taamnei.

A taromauria te atua temanna ae Allah Mutirim.a A taekinna aomata aika kaain Aaro ake aongkoa Kristian ngaiia, bwa te Atua bon te Temanna n teniman, ae te Atua te Tama, te Atua te Nati ao te Atua te Taamnei ae Raoiroi. A kakoauaa Hindu bwa iai atua aika mwaane ma aine aika raka i aon tenga mwaitiia. A taku tabemwaang bwa a memena taian taamnei i nanon aeka ni man tabeua, aeka n aroka tabeua, taiani bwaa ao karaanga. Ao a kairaki tabemwaang rinanoni booki, taian taamnei ke kaongora n terewitin bwa a na kakoauaa taekaia anera ao taimonio, anti ao atua aika mwaane ma aine.

N aron ae a bati iango aika kakaokoro ao ni kauntaba n taekaia atua aika mwaane ma aine, ma iai naba iango aika bati aika kakaokoro ao ni kauntaba ma arora n reitaki ma ngaiia. Ti kairaki ni bwainan te iangoraoi bwa ti na ataia ae a aki kona n nakoraoi waaki n itoman ni kabane. Iangoia n te aro aei: Imwain ae ti tareboon, ti riai n ataia bwa antai ae ti na tareboonia ao ni kakoauaa naba bwa bon iai te aomata anne ao e na tauraoi ni kaekaa ara tareboon. Ngkana ko kataia n reitaki ma te aomata ae bon akea ma ko karioa n am iango ao ko kabanebuakaa am tai iai. Ma ae buakaka riki, e karuanikai te reitaki ma te aomata ae baka n riki bwa te aomata are ko kan reitaki ma ngaia.

Mangaia are, antai raoi aika a maeka n te aba n taamnei? E aki tii kaekaaki te titiraki anne man te Baibara ma e kabwarabwaraaki naba iai bwa antai ae ko na reitaki ma ngaia ao tera te kaeka ae ko kona ni kantaningaia. Reitaanako am wareware. Ko na bae ni mimi n te bae e kaotaki n te Baibara.

[Kabwarabwara ae nano]