E Kona n Reke te Raunnano?

“A rau nanoia aomata aika a aki kaubwai ma a aki rau nanoia aomata aika a kaubwai.”​—Benjamin Franklin.

NI KAINETI ma te taeka n rabakau anne, a bati aika ataia bwa e aki kona ni kabooaki te raunnano n aroni baika kabooakinako. Maroaka ae te raunnano anne ae namakinan te kukurei i nanom, e taraa ni kangaanga karekeana n te aonnaba ae rikirake iai tangirani baika bati, ao uaiakinan te nakoa ae rietata riki ke te kakukurei ae reke irouia aomata tabemwaang! E a tia n rotaki maium ni baikai?

• A bati aia rongorongo taani katanoata aika ko ongongo are a tataekinna bwa e kona n reke te raunnano mani kabooani baika bati.

• Ko kaungaaki n te nano ni kaiangatoa bwa ko na iangoa ae ko raoiroi riki ni karaoani bwaai ni kabane n aron ae a a tia ni kakororaoia tabemwaang.

• A aki kakaitau aomata ni baika ko a tia ni karaoi ibukia.

• Ko kona ni bakantang n noran aia bwai raoraom.

• A tuai ni kaekaaki am titiraki aika kakawaki ibukin te maiu.

E boni kona n reke te raunnano ngkai ko kaaitara ma aeka ni kangaanga akanne? E kairekerekea ikai taekan “te bwai ae raba ibukin te raunnano” te abotoro Bauro. N tabetai, e a tia ni karekea ae bati ao n taai riki tabeua e a tia ni karekea ae aki tau. E kamoamoaaki irouia raoraona ma e kakanikoaki irouia tabeman. Ma e ngae n anne, e taekinna ae e a tia n “reireinna karekean te raunnano ni kataui bwaai ni kabane ake a riki nakoina.”​—I-Biribi 4:11, 12, New International Version.

E aki ataaki aron reken te raunnano irouia aika a tuai kekeiaki ni karekea, ma e kona n reiakinaki n aron ae e taekinna te abotoro Bauro. Ti a kaoko bwa ko na rinanoi ngkai baika nimaua aika raba ibukin reken te raunnano aika n Ana Taeka te Atua ae te Baibara.