Akea Ngkai Iangoan Raoi Nanon te Bure?
E AKI maan n nako, ao a katoatai n ongora taan taromauri mairouia mataniwi n aia Aaro kabuakakaani “buure aika itua ake a kakaiaki” n aron te kaibwabwaru, te buabeka, te mataai ni kanibwaibwai, te taningaroti, te un, te bakantang, ao te kainikatonga. N angiin te tai, a na kabwarabwarai kakaiakini kangaanga aika riki man te bure ao ni kaumakiia ake a ongora irouia bwa a na raraoma ao n rairi nanoia. E taku te tia kororongorongo temanna: “A motikia ngkai taan angareirei n Aaro bwa a na aki taekini baika irekereke ma te bure bwa a aonga n aki maamaa iai taan ongora, ma a kaatuui reirei ake a kairiia taan ongora bwa a na iangoia ae a raraoi aroaroia.”
A a tia tabeman taani kororongorongo ni kakoauaa te waaki anne. Aikai aia taeka tabeua ake a noraki n nuutibeeba:
▪ “A aikoa bati n taekinaki n aron are rimoa te bure, te raira n nano ao aron reken te kamaiuaki, ma a a taabangaki kabwarabwara aika karau nano ibukin onimakinara ao tangirara i bon iroura.”—Star Beacon, man te kaawa ae Ashtabula i Ohio.
▪ “E kuri n akea tabeakinan te bure ao maakakini karaoana.”—Newsweek.
▪ “Ti aikoa manga titiraki bwa ‘Tera ae e tangiria mairou te Atua,’ ma n oneani mwin anne ti kangai, ‘Tera ae e kona ni karaoia te Atua ibukiu?’”—Chicago Sun-Times.
Ti a maeka ngkai n te waaki ae kaainaki irouia aomata aika kakaokoro nako aia reeti, aia Aaro ao aia tautaeka ao e a kainnanoaki ngkanne te taotaonakinnano. Ibukin aei, a a tabwarabwara ni kabuakakai aroaroni maiuia tabemwaang. E iangoaki bwa bon tiaki te aro ae riai kabuakakaan aroaroia aomata. E taraa n ae kabuakakaan ana mwakuri te aomata, bon te bure ae te kabanea ni kakaiaki. Aio te iango ae bwainaki: ‘Tao e nakoraoi ibukim te bwai ae ko kakoauaa, ma ko aki riai ni kairoroa temanna riki n am iango. Ni boong aikai, a bairei maiuia aomata ni kaineti ma aroaro aika rangi ni kakaokoro. Tiaki tii ngkoe n ataa te bwai ae eti. Titeboo kakawakin aroaro aika iroum ma aroaro aika irouia tabemwaang.’
E a tia te aeka n iango aei ni karekea te bitaki nakon aia iango aomata. E a burenibwai ngkai kamanenaan te taeka ae “te bure” ibukini kabwarabwaraan te bwai ae boni buakaka, ma e a kabonganaaki bwa te manikangare irouia aika bati. A aikoa taekinaki aomata aika tuai ni mare ake a kaai ni maeka bwa a “maiuakina ae bure” ma a taekinaki bwa a tii “tekateka n taanga.” A aikoa taekinaki bwa taani “wene ni kimoa” ma a taekinaki bwa “iai aroaroia.” A aikoa taekinaki bwa a “wewene ni bure ma raoia n aine ke ni mwaane” ma a taekinaki bwa a tangira “te aeka ni maiu ae kaokoro.”
Akea te nanououa bwa e a tia ni bitaki te baere a tauraoi n iangoia aomata bwa e “riai” ke ni kabuakakaaki bwa “te bure.” Ma bukin tera ngkai a a bitaki aia iango aomata? Tera ae e riki nakon te baere e iangoaki ngkoa bwa te bure? Ao e kakawaki bwa tera raoi am iango iai?