Titiraki Mairouia Taani Wareware
Baikara bukina tabeua ake tao e kona n iangoaki iai te manga bwabetito?
Ni kaineti ma bukina tabeua, e bae ni kan iaiangoa manenani bwabetitoana te aomata ae e a tia ni bwabetitoaki ao n iangoa te manga bwabetitoaki. N te katoto, n tain te bwabetito tao e a tia te aomata anne ni karabarabaa aroni maiuna ke karaoani mwakuri ake e kona ni kabaneaki iai man te ekaretia ngke arona bwa e a kamani bwabetitoaki. E kona ni karaoa ana katabu nakon te Atua ngkana e kakaraoi aaro akanne? E kona te aeka n aomata anne ni katabua maiuna nakon Iehova n te aro ae manena tii ngkana e a tia ni katoka aroarona ae e aki boraoi ma te Baibara. Ngaia are e kona n iangoa te manga bwabetito te aomata are iai irouna te bwai n tutuki ae kakaiaki nakoni katabuana ngke e moani bwabetitoaki.
Ma tera aron te aomata are e kakaraoa te bure ae kainnanoa rinanoakina iroun te komete ni kaboowi n te ekaretia, tiaki n taini bwabetitoana ma imwini bwabetitoana? Iangoia bwa e bae n taekinna bwa e aki ota raoi n te baere e karaoia ngke e bwabetitoaki ao n taku bwa e bon aki manena raoi ana bwabetito arei. Ngkana a maroro unimwaane n te ekaretia ma te tia bure ao a aki riai n tabeki titiraki ni kaineti ma ana bwabetito ao n titirakinna ana namakin bwa e manena ana katabu ao ana bwabetito ke e aki. Ni koauana, e a tia n ongo te kabwarabwara man te Baibara ibukini kakawakin te bwabetito. E kamatoai ana kaeka ae eng nakon titiraki ni kaineti ma te katabu ao te bwabetito. Rimwi e onea ana kunnikai ao ni kateboaki n te ran. Ngaia are, e bon riai ni kakoauaaki bwa e bon ota raoi ni kakawakin te bwai ae e karaoia. A riai unimwaane n te ekaretia ni bairea taekana n aron te aomata ae e a tia ni bwabetitoaki.
Ngkana iai temanna ae tabeka te titiraki ni kaineti ma manenan ana bwabetito, a kona ni kairia unimwaane nakon taian Taua-n-Tantani n te taetae n Ingiriti aika bwaini Maati 1, 1960, iteraniba 159 ao 160, ao Beberuare 15, 1964, iteraniba 123 nakon 126, ike e a kabwarabwaraaki raoi iai taekan te manga bwabetitoaki. Ngaia are e a bon nakon ana motinnano te aomata i bon irouna iangoan te manga bwabetitoaki ngkana iai bukina tabeua (n aron ae e memeere ana atatai i aon te Baibara ngke e bwabetitoaki).
Baikara baika a riai n iaiangoia Kristian n te uaia ni maeka n te auti teuana?
A bane aomata ni kainnanoa reken aia tabo ni maeka. Ma e ngae n anne, a bati ni boong aikai aika akea oini mwengaia. Ana kangaanga temanna ibukin te mwane, marurungin rabwatana, ke tao bwaai riki tabeua, a kona ni karekea ae a nang uaia ni maeka kaain te utu ae bati kaaia n ikotaki naba ma aia buu ni kaan aika bati. N taabo tabeua n te aonnaba, a kona n noraki utu akanne bwa a ibetutu ni maeka n te ruu ae tii teuana n akea te tabo ae a na raba iai n tii ngaiia.
Bon tiaki taben ana botaki Iehova katauraoan tuua aika bati ni kaineti ma taabo ni maeka aika tau ibukia kaain te ekaretia ni katobibia te aonnaba. A kaungaaki Kristian bwa a na iaiangoi booto n reirei man te Baibara bwa a aonga n ataia bwa e kakukureia Iehova aroia ni maeka ke e aki. Baikara tabeua mai buakoni booto n reirei aikai?
Te moanibwai ae riai iaiangoana bon rotakira ao rotakin ara onimaki irouia aomata ake ti uaia ni maeka ma ngaiia. Aeka n aomata raa aomata aikai? Taan taromauria Iehova ngaiia? A maiuakina ae boraoi ma ana kaetieti nako te Baibara? E korea ae kangai te abotoro Bauro: “Tai burebureaki. A urui aroaro aika raraoi taian iraorao aika bubuaka.”—1 I-Korinto 15:33.
E kabwarabwaraaki n te Baibara bwa e kabuakakaa te wene ni bure ao te wene ni kimoa Iehova. (Ebera 13:4) Ngaia are e rangi ni mataata bwa e bon aki kukurei te Atua ni babairean te aro ni matu are a kona ni kariaiakaki iai te mwaane ao te aine aika tuai ni mareaki bwa a na uaia ni maeka kanga ai aroia taanga aika mareaki. E na bon aki kani maeka te Kristian n te tabo ae kariaiakaki iai te wene ni bure.
Ma irarikin anne, a kaumakaki aomata aika a kan akoaki iroun te Atua bwa a na “birinako man te wene ni bure.” (1 I-Korinto 6:18) Boni kaotiotan te wanawana ngkana a rarawa Kristian nakoni waaki ni maeka ake a kona ni kauekea kaririakia nakoni karaoan te wene ni bure. N te katoto, iangoia bwa a uaia ni mamatu n te auti ae tii teuana Kristian tabeman. E kona te maeka ikanne ni kairiia nakon te kataaki ibukini baika aki kantaningaaki? Tera ae e na riki ngkana a a tii karina naba n tiku aomata aika uoman aika tuai ni mareaki, ibukina bwa aomata ake a bon memena i rarikia a tii kitania naba n te tai anne? N aron anne, e na rangi ni karuanikai nakon te aroaro ni maiu ae riai te uaia ni maeka n te mwenga teuana irouia aika tuai ni mareaki, ngkana arona bwa aomata akanne a boni kareketangira i marenaia. E kaotiotaki te wanawana ngkana e totokoaki te aeka ni maeka aei.
Ao ai arona naba, bwa a aki riai aomata aika a tia ni buuraure n teimatoa ni maeka n te auti ae tii teuana. Bwa aroaroia rimoa n aia reitaki ae rangi ni kaan i marenaia, e kona ni kairiri nakoni karaoan te wene ni bure.—Taeka N Rabakau 22:3.
Te kabanea ni bwai ae riai naba iaiangoana ae rangi ni kakawaki bon aron aia iango aomata aika irarikimi ni kaineti ma ana rinerine temanna. Ngkana tao e rinea te waaki ni maeka ae e taku te Kristian bwa e riai, ma e kauekea te karaki ae aki raoiroi irouia aomata aika i rarikina, e riai n iaiangoaki raoi anne. Ti aki kani karaoi aroarora aika a na kabuakakaa aran Iehova. E taekinna n te aro aei Bauro: “Kam na tai riki bwa bwaai ni kabwakabwaka nakoia I-Iutaia ma I-Kuriiti ao kaain ana ekaretia te Atua, n arou ae I kakukureiia aomata nako ni bwaai ni kabane, ao I aki ukoukora oini kabwaiau ma I ukoukora kabwaiaia aika bati, bwa a aonga ni kamaiuaki.”—1 I-Korinto 10:32, 33.
E kona n riki bwa te kangaanga ni koaua kakaaean te tabo ni maeka ae riai ao waaki ni maeka aika nakoraoi irouia ake a kani kawakin ana kaetieti Iehova aika raraoi. Ma e ngae n anne, a riai Kristian n “teimatoa n tutuoa bwa tera ae e kukurei iai te Uea.” A riai ni kakoauaa raoi bwa e na akea te bwai ae aki riai ae karaoaki irouia kaani bataia. (I-Ebeto 5:5, 10) Ibukin aei, a kainnanoaki Kristian bwa a na tataroakina ana kairiri te Atua ao ni karaoa aia kabanea ni kona ni kawakina marurungia, aroaroia aika raraoi ao ai raoiroin aran Iehova.