E moan riki mai ia te oto karaki aei? “E a korakora rikiraken taromaurian tinan te Atua ngke . . . a a raanga beekan aika rangi ni mwaiti nakon te Aro. . . . I nanoni nga ma nga te ririki ao e a tia ni bwebwerake aroia n taromauri ao aia iango ni kaineti ma te Atua [beekan ake a rairaki nakon te Aro ni Kristian] rinanon taromaurian te atua n aine ae te ‘tina ae kakannato’ ao te ‘kibono mairoun te Atua.’”​—The New Encyclopædia Britannica (1988), Volume 16, iteraniba 326 ao 327.Tera ana reirei te Baibara? “Ane ko na kariki i nanoni birotom, ao ane ko na bungia te nati te mwane, ao ko na aranna ba Iesu. Ane E na kakanato, ao E na aranaki ba Natin Teuare Moan te Rietata: . . . E na atongaki ba Raoiroi, ae Natin te Atua.”​​—Ara bwai te manreireiti; Ruka 1:31-35.

E mataata raoi ni kibun te Baibara anne bwa Maria bon tinan “Natin te Atua,” ao tiaki tinan te Atua. E koaua bwa e na kona Maria n uouota Teuare ‘e aki kona . . . karawa ni karawa ni kamwaneauaa’? (1 Uea 8:27) E aki naba taekinna Maria bwa ngaia tinan te Atua. Ma bon te reirei ae te Temanna n teniman ae kamangaoa taekani Maria. N 431 C.E., e a tia te Boowi mai Ebeto ni kauekea taromauriani Maria n aroia n atonga neiei bwa Theotokos (te taeka ni Kuriiti ae nanona “te aine ae bungia te Atua”), ke “Tinan te Atua.” E a kaman riki kaawan Ebeto are e karaoaki iai boowin te Aro aei i nanon tienture aika bati, bwa nibwan taromaurian te atua n aine ae atuan te kakariki ae Nei Aretemiti.

Ai ngaia are, a bati iteran nako taromauriani bouan Nei Aretemiti are e “baka mai karawa,” n aron te katiki, ake a karinaki bwa taromauriani Maria. (Mwakuri 19:35, BK) Te katei teuana riki ae e tabe n rin teutana imwin teutana n te reirei ni Kristian, boni kamanenaani bouani Maria ao tabeman riki, n te taromauri.

Kabotaui kibun te Baibara aikai: Mataio 13:53-56; Mareko 3:31-35; Ruka 11:27, 28

TE KOAUA IAI:

Maria bon tinan Natin te Atua, ao tiaki tinan te Atua. E moan riki taromauriani Maria ae aongkoa Tinan te Atua man te koaua ae te Temanna n teniman