Titiraki Mairouia Taani Wareware

N tataekinan te rongorongo ao e a tia Iesu ni kabutaa te aba. Ma e kanga n taku te abotoro Betero bwa ‘a karaoa te baerei ngke a aki ataia’ I-Iutaia ao aia tia tautaeka ngke a imanonoa kamatean Iesu?​—Mwakuri 3:17.

Ngke e taetae ni kainetiia I-Iutaia ibukini kamatean te Mesia ao e taku te abotoro Betero: “I ataingkami ngkai, ba kam karaoa te baerei ngke kam aki ataia, ao ai aroia naba ami tia tautaeka.” (Mwakuri 3:14-17) Tabeman I-Iutaia a aki ataia ae Iesu bon te Mesia ao tao a bon aki ota n ana angareirei. E irekereke bukin babangaia ni kaineti ma ataakin te Mesia ma karakoni kani kakukureian te Atua irouia tabemwaang, te inanonano, te bakantang ao ai te riribai ae korakora.

Iangoa aron rotakin aia taratara aomata aika bati n ana angareirei Iesu ni karakoni kani kakukureian Iehova irouia. N angiin te tai, e teimatoa n angareirei Iesu ma kaikonaki ao ni kabwarabwarai nanoia nakoia te koraki aika a ingainga ni kan reirei riki. Tabeman mai buakoia aika a ongora irouna, a a manga kitanna ao a aki kakorakoraia bwa a na ota. N te tai teuana iai naba tabeman taan rimwin Iesu ake a un irouna ngke e kabongana te taetae ni kaikonaki teuana. (Ioane 6:52-66) A kabwaka te koraki aei n ota n ana kaikonaki Iesu are a tuoaki iai tauraoia ni bitii aia iango ma aia mwakuri. (Itaia 6:9, 10; 44:18; Mataio 13:10-15) A kakeaa naba uaan te taetae ni burabeti are e kaineti ma aron te Mesia ni kabonganai kaikonaki n ana angareirei.​—Taian Areru 78:2.

Tabemwaang a totokoa ana angareirei Iesu ibukin te inanonano ao te ribuaka. Ngke e angareirei n te tinakoka i abana i Natareta ao a “mimi” aomata. Ma e ngae ngke e koaua aei ma a aki butimwaea Iesu bwa te Mesia, ao a manga tabeki titiraki ibukin rikiana ni kangai: “A reke maia baikai iroun Teuaei? . . . Tiaki te kaamta Teuaei, are Natin Nei Maria, are tarin Iakobo, ma Iote, ma Iuta, ma Timon? ao tiaki a mena mwanena i roura ikai?” (Mareko 6:1-3) Bon akea manenan ana angareirei Iesu irouia kain Natareta ibukin ataakin kaikawaana ae mangori.

Ma tera aroia mataniwia Aaro? Angia mai buakoia, a aki rangi ni mutiakina Iesu ibukin aaro naba aika kuri n titeboo ma akanne. (Ioane 7:47-52) A bon aki naba butimwaea ana angareirei ibukina bwa a bakantang iroun Iesu are a kakauongo irouna aomata. (Mareko 15:10) Ni koauana, a un ao n rawa nakon Iesu aomata aika mwaiti aika iai nakoaia ngke e kabuakakaia ibukin aroia ni baka n raoiroi ao ni mwamwanaa te aba. (Mataio 23:13-36) Ni kaineti ma karakon aia atatai, e rangi n eti Iesu ngke e kabuakakaia ao n taku: “A na reke kaimi, taan reirei te Tua! ba kam uota nako kingin te atatai: kam aki rin [n te Tautaeka n Uea], ao kam tukiia akana kan rin”!​—Ruka 11:37-52.

E tataekina te rongorongo ae raoiroi i abaia Iesu i nanon tenua ao te iterana te ririki. E bon reirei ni kataneiaia aomata tabemwaang bwa a na ibuobuoki n te mwakuri anne. (Ruka 9:1, 2; 10:1, 16, 17) A rangi n anaaki nanoia aomata iroun Iesu ma taan rimwina n te aro are a a ngurengure Baritaio: “Noria, e nako te aba n iria.” (Ioane 12:19) Ngaia are tiaki nanona bwa angia I-Iutaia akea te bwai ae a ataia. Ma a teimatoa n ‘akea aia atatai’ ibukin Iesu are te Mesia. A boni kona ni kakorakoraa aia atatai ao tangiran te Mesia irouia ma a bon aki. A ataaki tabeman bwa a a irekereke ma maten Iesu. N te aro aei ao a bati ake e kaumakiia te abotoro Betero ni kangai: “Kam na raraoma, ma n rairi nanomi, ba a na kamaunaki ami bure, ba a aonga n roko boongi ni kamaiu mai matan te Uea; ao E aonga ni kanakomaia te Kristo are rineaki i bukimi, are Iesu.” (Mwakuri 3:19, 20) E kakannongora ngkanne ataakin ae nga ma nga I-Iutaia, a a moanna ni kakauongo raoi n ikotaki ma ‘ibonga aika bati.’ A aki manga karaoa te bwai teuana n aki ataia. Ma a rairi nanoia ao mani karekea akoaia mairoun Iehova.​—Mwakuri 2:41; 4:4; 5:14; 6:7.