Bon te Aomata ni Koaua te Atua ke Tii te Mwaaka?

Kaeka aika taabangaki:

◼ “E mena n taabo nako, ao ni bwaai ni kabane, kaanga ai aron te ang.”

◼ “Bon ai aron te wanawana ae aki kona ni kabwarabwaraaki ngaia, ae tii te mwaaka ae aki ataaki moan rikina.”

Tera ae e taekinna iai Iesu?

◼ “A bati nee ni maeka n ana auti Tamau.” (Ioane 14:2) E taekina te Atua Iesu n te aro ni kaikonaki bwa kaanga iai ana auti ke ana tabo ni maeka.

◼ “I nako mai mairoun te Tama, ao I roko i aon te aba: I a manga kitana te aba, ao I nako n te Tama.” (Ioane 16:28) E kakoauaa Iesu ae te Atua bon te aomata ni koaua bwa iai ana namakin, aroarona ao iai ana tabo ni maeka n te tabo teuana.

AKEA te tai teuana ae e a tia n taekinna iai Iesu bwa te Atua bon te mwaaka ae aki ataaki moan rikina. E kaitaraa te iango anne Iesu ngke e taetae nakon te Atua ao e tataro naba nakoina. E aki toki n atonga Iehova bwa Tamana are i karawa, ae te taeka ae e a kaotaraeaki iai ana itoman ae rangi ni kaan ma te Atua.​—Ioane 8:19, 38, 54.

E koaua bwa “bon akea temanna ae nora te Atua ma ngkoa” ao “bon te Tamnei te Atua.” (Ioane 1:18; 4:24) Ma e aki nanonaki n anne bwa akea aekan rabwatana riki teuana ke teina. Ti tuangaki ae kangai n te Baibara: “Ngkana iai te rabata ae bon te rabata, ao bon iai te rabata ae te rabata n tamnei.” (1 I-Korinto 15:44) Mangaia are iai ngkanne rabwatan Iehova ae te rabwata n taamnei?

Eng. Ngke e kautaki Iesu ao e “bon rin i karawa, ba E aonga ni kaoti i matan te Atua i bukira.” (Ebera 9:24) Ti reireiaki n aei baika uoua aika kakawaki ibukin te Atua. Te moan, iai ana tabo ni maeka. Te kauoua, e na kanga ni kaoti Iesu “i matan” te Atua ngkana te Atua bon tii te mwaaka ae aki kona ni kabwarabwaraaki ae memena n taabo nako? E mataata n aei bwa bon te Aomata te Atua.

E kanga ngkanne n iai mwaakan te Atua ni kona n tautaekani bwaai ni kabane? E boni kona te Atua ni kanakoa taamneina ae raoiroi ae mwaakana ae mwamwakuri nakon taabo nako n te iuniweeti. N aron te karo ae arora nako baina ni kabebeteia natina ao ni boutokaia, ai aron naba te Atua ni kabongana taamneina ae raoiroi ni kakororaoa ana kantaninga.​—Taian Areru 104:30; 139:7.

Kioina ngkai bon te Aomata ni koaua te Atua, ngkanne iai aroarona, iai naba baika tangiraki ao n ribaaki irouna ao ai uana naba ma ana namakin. E taekinaki n te Baibara bwa e tangiriia ana aomata, e kimwareirei n ana mwakuri nako, e ribaa taromauriani boua ao e maraki nanona ibukin te buakaka. (Karikani Bwaai 6:6; Te Tua-Kaua 16:22; 1 Uea 10:9; Taian Areru 104:31) N 1 Timoteo 1:11, (NW) e aranaki bwa “te Atua ae kukukurei.” Maroaka ae e taku Iesu bwa ti kona n reiakina tangiran te Atua aei ma nanora ni kabane!​—Mareko 12:30.a

[Kabwarabwara ae nano]

[Taamnei n iteraniba 5]

N aron te tama ae arora nako baina, ai aron naba te Atua ni kabongana taamneina ae raoiroi ni kakororaoa ana kantaninga