Ngkana E Mate ae Ko Tangiria

N tairikin te Kauabong ae Turai 17, 2007, tao n te aoa itua ao e a maran nako te waanikiba tewaana ae uakaan ma te marae n te tabo ni waanikiba ae tatabetabe n taai nako, i nukan te kaawa ae São Paulo i Brazil. E buti riaon te kawai ae bubura te waanikiba aei ao e untaba ma te auti ni kaako ae totoa. A mate 200 mwaitiia aomata n te kabuanibwai aei.

E A TIA ni kabwarabwaraki bwa aio te kabuanibwai ae te kabanea ni korakora i Brazil ae e na aki kona ni mwanuokinaki irouia te koraki ake a a tia ni motirawa iai aika tangiraki irouia. Temanna mai buakoia ake a taonaki n te rawawata anne, bon Nei Claudete. E tabe neiei ni mataku n te TV ngke e a tii ongo naba rongorongon untaban te waanikiba. Boni kaain te waanikiba anne natina te mwaane ae Renato ae ai tibwa 26 ana ririki. E a tia ni baireia teuaei bwa e na mare n Okitobwa. E rangi ni korakai nanon Claudete ni kataia n tarebonia n te tarebon ae uouotaki, ma akea kaekaana. E bwaka i aontano ma n tang n te aro ae akea ae e kona ni kabebetea.

E mate ana kainrou Nei Antje ngke e kabuanibwai n untaban te kaa n Tianuare 1986. Ngke e ongo te rongorongo anne neienne, e bua ana iango n rawawatana. “Te bwai are moan riki nakoiu, I bon aki kakoauaa. I taku bwa I mii buaka ao N na waekoa n uti n noria bwa e aki koaua. I ruru ao e rangi ni korakora marakini birotou n aron ae kaanga e oreaki iroun temanna.” E rinanon te rawawatannano Nei Antje i nanon ririki ake tenua ake imwina. E ngae ngke ai 20 tabun te ririki imwin te kabuanibwai anne ma e teimatoa n ruru neiei n uringan te bwai are e riki.

A aki kona ni kabwarabwaraki namakin aika riao n aron te buannano, te kakewekewe, te aki namakinaaba ao te bwarannano ake a riki imwin aekani kabuanibwai aika aki kaantaningaki. Ma n taai tabetai ko bon ataia bwa e na mate ae tangiraki iroum ibukina bwa e a maan aorakina ae kakaiaki, ma e ngae n anne e boni korakora naba te nanokawaki iai. Akea temanna ae e kona n tauraoi ni butimwaea maten ae tangiraki irouna. E mate tinan Nei Nanci n te ririki 2002 man te aoraki ae wene maan irouna. Ma n te bong are e mate iai tinana, e tekateka i aontano n te onnaoraki Nei Nanci ma te buannano ae korakora. Titeboo bwa ai akea bongan te maiu irouna. Ao ngkai ai nimaua te ririki n nako ma e bon teimatoa naba n tang ngkana e uringa tinana.

E taekina ae kangai Dr. Holly G. Prigerson, “A aki kona n tokanikai i aon rawawataia ni motirawan ae tangiraki irouia, ma a bon tii butimwaeia.” Ngkana tao ko karawawataaki ni maten temanna ae tangiraki iroum n te aro ae ko kaantaningaia ke ko aki, ko kona n iango ni kangai: ‘E riai bwa N na rangi n nanokawaki? N na kanga ni kekeiaki ribuakon nanokawakiu ni motirawan ae tangiraki irou? I kona ni manga kaitiboo riki ma ae tangiraki irou?’ A na rinanoaki titiraki aikai ao tabeua riki ake mairoum n te kaongora ae imwin aei.

[Picture Credit Line n iteraniba 3]

EVERTON DE FREITAS/AFP/Getty Images