Titiraki Mairouia Taani Wareware

E taku te abotoro Bauro bwa “a na kabaneaki ni kamaiuaki Iteraera.” (I-Rom 11:26) Ma te koaua bwa e nanonna iai bwa e na roko te tai are a na bane kaain Iutaia n rairaki nakon te Aro ni Kristian?

Tiaki anne ae e nanonna Bauro. Angiia kaain Iteraera ake a riki mairoun Aberaam a rawa ni butimwaea Iesu bwa te Mesia. E mataata n ririki ake imwini maten Iesu, bwa a na aki bane n rairaki kaain Iutaia nakon te Aro ni Kristian. Ma e ngae n anne, e boni koaua ana taeka Bauro are “a na kabaneaki ni kamaiuaki Iteraera.” N te aro raa?

E tuangia mataniwi n te Aro n I-Iutaia Iesu ni kangai: “E na anaki Uean te Atua mairoumi, ao e na anganaki te botanaomata teuana ae e na karekei uana.” (Mataio 21:43) Kioina ngkai angiia kaain Iteraera a rarawa nakon Iesu, e na rinea te botannaomata ae boou Iehova, ae te botannaomata n taamnei. E arana te botannaomata aei Bauro bwa “ana Iteraera te Atua.”​—I-Karatia 6:16.

A kaotaki ni kiibu tabeua riki n te Baibara ni Kristian n te Taetae ni Kuriiti bwa e kaainaki “ana Iteraera te Atua” irouia Kristian aika kabiraki n te taamnei, aika 144,000 mwaitiia. (I-Rom 8:15-17; Te Kaotioti 7:4) Bon iai naba i buakoia kaain te koraki aei aika tiaki kaain Iutaia, n aron ae kakoauaki n Te Kaotioti 5:9, 10, are e kaotaki iai bwa a na rineaki Kristian aika kabiraki “mai buakoia baronga nako, ma taetae, ma natanaomata, ma botanaomata.” A rineaki kaain te Iteraera n taamnei bwa te koraki aika a na ‘uea ma n ibonga,’ ao a na “tauu taeka i aonaba.” E ngae ngkai e a tia Iehova ni kakeaa te botannaomata ae Iteraera ao ai tiaki ana botannaomata ae rineaki ngkai, ma a boni kona naba ni manga raoiakinaki ma ngaia kaain Iteraera tabeman. Bon anne ae riki nakoia abotoro ao Kristian aika mwaiti rimoa. Ma a riai moa kaain Iutaia akanne ni kabooaki n raraan Iesu Kristo n ai aroia aomata ni kabane.​—1 Timoteo 2:5, 6; Ebera 2:9; 1 Betero 1:17-19.

E ngae ngke angiia kaain Iutaia ake n te moan tienture, a kabuaa rineakiia nakon te nakoa are te uaia n tautaeka ma Iesu, ma e bon aki naba tokobitoaki iai ana kaantaninga te Atua. E bon aki kona n riki anne, bwa e kangai Iehova rinanon ana burabeti: “Ao ai aron naba te taeka ae I atongnga, e na bae naba ni karika uana, e na kakoroa bukin au iango ma ni karaoa kanoani muiokoana.”​—Itaia 55:11, BK.

E na koro naba bukin ana kaantaninga te Atua are e na kateirakeia taan uaia n tautaeka ma Natina i karawa, aika 144,000 mwaitiia. E kamatataaki n te Baibara bwa e na kakoroa te mwaiti anne te Atua ma ni kabiria ni kabaneia. Bon akea temanna ae e na bua mai buakoia!​—Te Kaotioti 14:1-5.

Mangaia are ngke e koreia Bauro bwa “a na kabaneaki ni kamaiuaki Iteraera,” e aki kaman taekinna bwa a na bane n rairaki kaain Iutaia nakon te Aro ni Kristian. Ma e nanonna iai bwa e na boni koro bukin ana kaantaninga te Atua are a na roko kaain te Iteraera n taamnei ake 144,000 mwaitiia i karawa, ike a na uaia n tautaeka iai ma Natina ae Iesu Kristo. N ana tai te Atua ae namatia aei, a na kamaiuaki kaain ‘Iteraera ni kabane,’ are nanona te mwaiti ae kororaoi anne. Ao ane a na tautaeka bwa uea ao ibonga n te Tautaeka n Uea iroun te Mesia, n te tai ae riai.​—I-Ebeto 2:8.

[Taamnei n iteraniba 32]

A rineaki taani kabiraki “mai buakoia baronga nako, ma taetae, ma natanaomata, ma botanaomata”