Noa ao te Ieka—Bon Te Koaua Ao Tiaki Te Karioiango
KO KAKARIARIAA rokon te aonnaba ae rangi n tamaroa riki are a na tekateka iai aomata ma te rau? ae te aonnaba ae akea iai te buaka, uruan te tua ao te ribuaka? Ngkana ngaia anne, ao ko na kona ni karekea ungannanom man rongorongon rimoa ae ko bon rangi n ataia. Te rongorongo aei bon rongorongon te aomata ae raoiroi ae Noa, are e kabaa te aake ao ni kamaiua iai ma ana utu n rokon te ieka are e kabutaa te aonnaba, are a a kamaunaki iai ake a buakaka.
Ma bon iai naba tii tabeua karaki aika a rangi n ataaki riki nakon aei. E kona n noraki rongorongoni baike a riki nakon Noa, n te boki ae Karikani Bwaai mwakoro 6 nakon 9, ao e aki toki naba n tataekinaki n te boki ae tabu ae te Koran, ao n aia karaki nikawai aomata aika mwaiti ni kabutaa te aonnaba. Te koaua bwa e bon riki te Ieka, ke tao bon tii te karaki ae karioaki ibukini kaungaaia aomata nakoni kakaraoan ae raoiroi? A a tia taan rabakau n taekan te Aro ao taan rabakau ni bwain te aonnaba, ni kauntaekaa aei i nanon tienture aika mwaiti. Ma e ngae n anne, ao te Baibara ae Ana Taeka te Atua, e kamataataa raoi te rongorongo aei, bwa bon te koaua ao tiaki tii te karioiango. Iangoi bukina tabeua aika a na karinanaki i nano aika ti kona ni kakoauai iai rongorongo ake ni Karikani Bwaai:
Ni Karikani Bwaai ao ti kaongoaki iai te ririki, te namwakaina, ao te bong are e moan roko raoi iai te Ieka. E kaongoira naba te tai ao te tabo are e koro iai te aake, ao te tai are e mwauteretere raoi iai te aba. A kaotaki raoi naba kabwarabwaran te aake n aroni baireana, abwakina ao baike a kabonganaki ibukini kabaana. Ma ni kaitaraan anne, a aki kona ni kamatataaki raoi baikanne ni karaki aika karioaki.
E kaotaki n te Baibara rongorongo aika uoua ake a kabwarabwaraki iai kateirikiaia aomata, bwa bon te aomata ni koaua Noa. (1 Rongorongo 1:4; Ruka 3:36) A karaua raoi ni karaoa aia ukeuke taani kakaae, aika Etira ao Ruka i aoni kateiriki aikai. E karaoa naba ana kakaae Ruka i aoni kateirikian Iesu Kristo ni moa mairoun Noa.
A koreaki rongorongon Noa ke te Ieka irouia burabeti aika Itaia ao Etekiera, ao irouia naba abotoro aika Kristian aika Bauro ao Betero.—Itaia 54:9; Etekiera 14:14, 20; Ebera 11:7; 1 Betero 3:19, 20; 2 Betero 2:5.
E taekina naba te Ieka Iesu Kristo ni kangai: “Aron aon te aba n ana bong Noa bon ai arona naba n ana bong Natin te Aomata. A amamarake, ao a momoi, ao a iein, ao a inaki, ni karokoa te bong are e rin iai Noa n te ake, ao e roko te ieka ni kamaunaia ni kabaneia.” (Ruka 17:26, 27) E na bon akea nanoni baike e taekin Iesu ni kaineti ma “ana bong Natin te Aomata” ngkana ngaia bwa e bon aki riki te Ieka.
E a kaman taekinna te abotoro Betero bwa ane a na roko “taani kakaniko” ni kakewei baike e taekin te Baibara. E korea ae kangai Betero: “Ba e raba aei i rouia, ngkai a aki kan ataia . . . are e uruaki iai aon te aba are [n ana bong Noa] ngke e iekaki n te ran.” E riai n raba ‘te koaua aei’ nakoira? E bon aki! E reitia ni kangai Betero: “A kaikoaki taiani karawa aika iai ngkai ma aonaba n ana taeka naba, ni kawakinaki ba karean te ai n te bongi ni kaeti ma ni kamateia aomata aika aki tangira te Atua.”—2 Betero 3:3-7.
N te taina, ao e na manga kamaunaia riki aomata aika buakaka te Atua, ma e na iai naba aika a na kamaiuaki. Ngkana ti kaboraoa maiura ma maiun Noa, ti na kona iai ngkanne ni mena i buakoia te koraki aika raoiroi ake a na kamaiuaki nako aon te aonnaba ae tikauarerei.