E Kona n Reke te Bonnano n te Aonnaba?

E KAANTANINGAKI ngkai rokon te rau nakon te aonnaba, ke te kabuanibwai? N taraana, iai koaua aika kona ni boutokai kaantaninga aika uoua aikai.

N te itera teuana, a kakoauaa taan tautaeka tabeman bwa a boni kona ni karekea te rau nakon te aonnaba. A taekina anne bwa tao e bon rangi ni kakamaaku taraan te aonnaba ngkana e na aki reke anne. Ma n te itera riki teuana, a bati aomata aika e korakora raraomaia ni kaineti ma titiraki n aron aikai: Antai botannaomata aika iai irouia bwaai ni buaka aika korakora aia urubwai? A na boni kabonganai? Tera ae na riki ngkana a kabonganai bwaai ni buaka aikai?

E kaotaki n rongorongon rimoa bwa te kaiangatoa ao te kairiribai bon aroaro aika tuuka reken te bonnano. A bati naba aia mwakuri Aaro, aika kauekea te kaiangatoa ao te kairiribai n onean mwin ae a na katoki. E korea ae kangai te tia koro rongorongo ae James A. Haught: “Bwaai ni kabane aika karika te iraraure i marenaia aomata a kona ni kauekea naba te kairiribai. Ao e korakora riki aia mwakuri Aaro ni karekea te iraraure i marenaia aomata.” E reitia riki n taku: “E ngae ngke e taabangaki te koaua ae aongkoa Aaro a karaoiroi maiuia aomata, ma e teretere bwa a bon tia naba ni kairiia tabeman bwa a na karaoi mwakuri aika a rangi n riao buakakaia.” E boraoi naba n iango ma aei, te tia koro rongorongo ae Steven Weinberg ngke e korea ae kangai: “Tii te iraraure ae kauekeaki irouia Aaro ae kona ni kairiia aomata ake a taneiai ni kakaraoa ae raoiroi bwa a na manga karaoa ae buakaka.”

Ma te koaua bwa iai te kaantaninga ae e na manga reke te bonnano n te aonnaba n te tai teuana? Eng! Ma e aki mena nibwan te bonnano irouia aomata ke Aaro ake a kateaki irouia aomata, n aron ae ti na noria.

[Taamnei n iteraniba 3]

Te koaua bwa te aonnaba, kaanga ai aron te boom ae nang rebwetaua?