Mwaakan te Newe
A BWAKIN newen te giraffe e nakon 18 te inti ao e baitii ma ni korakora ni burita baan te kai ma ni mwangana. Tinebun newen te kua ae te kua ni marawa ai aron tinebun te erebwanti. Iangoa ngkanne mwaitin te korakora ae kainnanoaki ibukin kamwaingana!
Newen te aomata e uarereke riki abwakina, rawawatana, ao korakorana nakon anne. Ma e rangi ni mwaaka riki. E taekina bwain te rabwata ae uarereke aei te Baibara ni kaotia bwa e “mena te mate ma te maiu ni mwakan te newe.” (Taeka N Rabakau 18:21) Bwa iangoia, mwaitira te tai ae ko ongo bwa e kamamate newen te aomata ngkana e kabonganaki n taekinaki iai te kewe ao te uarao, ao ni karika te urubwai ke maten te aomata ae akea ana bure?
E a tia naba te newe n urua te iraorao n taeka ni kamarakinano. E a tia naba n urua nanon te aomata n taeka aika a matoatoa, n ai aron naba Iobi are a bati taeka n uarao ibukina mairouia raoraona. E kangai: “Maan ra ngkami ni kabonoa nanou, ma n ototeai n taian taeka?” (Iobi 19:2) E kamataataa te tia rimwin Kristo ae Iakobo aron urubwain te newe ngkana e aki tauaki arona ni kangai: “Te newe, boni bwain te rabata ae uarereke, ao e kabatia kamoamoana. Noria, ai bati ra kaai aika kauraki n te ai ae uarereke. Ao te newe bon te ai.”—Iakobo 3:5, 6.
Ma n te itera teuana, mwaakan te newe e kona naba ni kakamaiu. A a tia taeka n nanoanga ao ni kabebetenano, ni kamaiuia aomata tabeman man rawawataia ao man bakabureaia. Taeka n reirei aika raraoi ake a kabonganaki, a a tia ni kamaiuia aomata ake a tautoronaki n taian drug, ao taani kakeru aika iowawa, man te moantaai ni mate. Te koaua, bwa uaan neweia aomata aika raoiroi “bon te kai ni kamaiu,” ao “te taeka ae atongaki n te tai ae riai ai aron abora aika koora i nanoni bwaene aika tirewa.”—Taeka N Rabakau 15:4; 25:11.
Kamanenan te newe n te aro ae te kabanea n raoiroi, boni kamoamoan Iehova ae te Atua, tataekinan te rongorongo ae raoiroi ibukin Ana Tautaeka n Uea te Atua, ao n reireia tabemwaang te koaua ae kakawaki man te Baibara. Bukin tera? E taku Iesu: “Ao aei aron reken te maiu ae e aki toki: a na ataiko, ngkoe te Atua ni koaua n ti ngkoe, ao a na ata Teuare ko kanakoa, ae Iesu Kristo.”—Ioane 17:3, BK; Mataio 24:14; 28:19, 20.
KO KANI KAWARAKI?
E ngae ngke ko mena n te aonnaba ae aki rau, ma ko kona ni karekea te kukurei man ataakin te koaua man te Baibara ibukin te Atua, ana Tautaeka n Uea ao ana kaantaninga ae moanibaan te raoiroi ibukia aomata. Ngkana ko kan atai riki rongorongo aikai, ke ngkana ko tangira kawaram iroun te aomata ae ko na reirei ma ngaia n te Baibara n akea boona, taiaoka ni kororeta nakoia Jehovah’s Witnesses, Box 23 Suva, Fiji, ke nakon te tabo teuana mai buakon taabo aika kaotaki n iteraniba 2.