E na Tauu Arora te Buakaka n Aki Toki?

E anaa te bwai teuana i aontano te teinimwaane ae uarereke ae rangi ni kumetaia, ao ngaia bon te boom, ike e a mataki ao ni mwauku iai ni kabane ana bong ni maiu. E kitana natina ae e a tibwa bungia temanna te tina i nanon te bwaketi ni maange, i rarikin te kawai. E okira ana tabo temanna te tia mwakuri are e a tia ni kabaneaki mai iai, ao e katiia aomata ni kabane ake e noriia, ao imwina e a bakabureia. E karaoa te mwakuri ni bwaitingako te mwaane ae karineaki n te kaawa teuana, nakoia ataei aika uarereke.

A KANANOKAWAKI ribootin mwakuri aika bubuaka aika rangi n taonaaba n taai aikai. Ma e a kananokawaki riki bwa n tabetai ao a aki bati n tabeakinaki ribooti aikai bwa iai ribooti aika kakamaaku riki tao ni kaineti ma rongorongon tiringaia kaain baronga tabeua ni kabane ao mwakuri n iowawa aika tiritiri. E kangai te kaongora teuana ae boretiaki n 1995: “Ai bon ana tienture Tatan [te ka-20 n tienture], kioina ngkai e rangi ni buakaka. Akea te tai teuana ae a a tia n noraki iai aomata bwa a rangi n rabakau ma n ingainga ni kan tiringia aomata aika mirion ma mirion mwaitiia, ibukin kaokoron aia reeti, aia Aaro ao aroaroia.”

N te tai naba anne, e a kabaarekaki te eea ma aontano irouia aomata, e a kerikaki kaubwaina ao a a tiringaki maan aika mwaiti kurikuri ni karokoa baneia. E kona te botannaomata n tokanikai i aoni baika bubuaka aikai ao ni kanakoraoa te aonnaba bwa e aonga n tamaroa riki ma ni kamanoaki raoi aomata iai? Ke karaoan aei titeboo ma e a kataaki n iaakinaki iai butin taari ni kaokaki? E taku temanna te professor are bati ana kaongora ake e korei i aon taekan te buakaka: “I a tia ni kaumaka riain karekean te bitaki n te aonnaba, bwa e aonga n nakoraoi riki. Ma akea rikiraken raoiroina ae e a tia n noraki ngkai.” Tao titeboo am namakin ma aei.

E kona ni kabotauaki waakin te aonnaba ma te kaibuke ae ieie ribuakon te marawa ae ririkirake ni buaka ao ni karuanikai. E ngae ngkai akea ae kukurei ni borau iai, ma e aki kona ni bitaki kawaina. E a bon tabe ni buti ngkai te kaibuke aei nakon te kabuanibwai ae aki kona ni katokaki.

E kona ni bukinaki aki kororaoia aomata ni korakoran rikiraken te buakaka aei. (I-Rom 3:23) Ma ngkana e iangoaki aron korakoran baika rangi ni bubuaka aika karaoaki ngkai, ai aron ae e a riaon te buakaka ae kona ni kauekeaki irouia aomata. Iai ngkanne te mwaaka ae aki nonoraki ae kairia aomata ngkai? Ngkana iai, ao tera te mwaaka anne, ao ti na kanga ni kamanoira mai iai? A na kaekaaki titiraki aikai n te kaongora ae imwina.

[Picture Credit Line n iteraniba 3]

© Heldur Netocny/Panos Pictures