Te Kiritimati Tera ae Tabe n Riki Iai?

TEBWINA te ririki n nako ao e taekinaki n te maekatin ae te U.S. News & World Report te kaongora ae “Kakaaean te Kiritimati,” are e a kaatuuaki iai te titiraki ae, e tabe n rikirake raoiroin te Kiritimati ma ni kerikaki waaki ni bitineti aika irekereke ma ngaia, ke e aki. Bon anne ae e tabe n riki ngkai?

E kaotaira te kaongora aei bwa e aera ngkai ti aki riai ni kaantaningaa rikin anne. E taku: “Akea te rongorongo ae kaota bukamaruan ana reke ni bong Kristo ni karokoa te kaaua n tienture ngke e a riki Constantine bwa te embera i Rom.” E aki bukamaruaki ibukina bwa “akea ae e ataa raoi ana bongi ni bung Iesu.” E taekinaki n te kaongora aei bwa “akea naba taekan te ririki are e bungiaki iai n euangkerio nako, mangaia are e a kangaanga riki ngkanne ataakin te namwakaina ke te bong.” E taku te tia korea rongorongon rimoa n te kuura ae rietata i Texas, bwa “a aki bukamarua bungiakin Iesu, Kristian ake rimoa.”

I aan atun te mwakoro ae “Te Katautau,” e maroroakinaki iai “aroni moan reken Ritembwa 25 irouia Aaro.” E taku: “E taonaaba butimwaean te iango ae te motirawa anne, bon ibukin iangoan kakiritianakia kaain Saturnalia ao bukamaru ni beekan ake tabeua riki.” “A rinea tain te Kiritimati bwa raabanen Ritembwa, ao ibukina bwa a a kaman taneiai aomata ni bukamaru iai, a a kataabangaka iai bukamaruan bungian te tia Kamaiu mataniwin Aaro.” N nukan te ka-19 n tienture, e a manga bitaki te bwai ae katuuaki iai nakon te bwabwaintangira i marenaia aomata. “E a karikirakea kaubwaiia aomata te katei ibukin te Kiritimati ae boou aei, ao a waekoa ni moana katanoataan te namwakaina anne taan iokinibwai ao taani katanoata.”

Mangaia are, bon akea te anga teuana ae e na iangoaki iai te Kiritimati bwa e a rikirake n raoiroi riki, bwa e a bae n kararoaa riki te aroaro ni Kristian ni koaua. E ngae ngkai e korakora reitan te waaki ni bitineti ma te Kiritimati, ma ni koauana, bon akea aia kaantaninga Kristian ni koaua ni kaineti ma riaia ni bukamarua bungiakin Iesu. Ma e katuruturuaki n te Baibara taekan te karea ni kaboomwi are e katauraoia Kristo ni matena ao waerakena nako karawa. (Mataio 20:28) E na teimatoa ni kakawaki anne ngkai ao n aki totoki.