E Aera Ngkai Ti Riai ni Kaakaraoa ae Raoiroi?
E TAKU ngkoa temanna te mwaane ae wanawana: “Ae i nanon rabatau: ba bon ae i rou te kani karaoia, ma e aki reke i rou karaoan ae raoiroi. Ba te raoiroi ae I kani karaoia ao I aki karaoia: ma te buakaka ae I aki kani karaoia ao I boni karaoia.” E aera ngkai e kangaanga iroun teuaei karaoan te raoiroi are e kani karaoia? E kabwarabwaraa ni kangai: “Ma ngaia ae e a reke i rou te tua aei, ba ngkana I kani karaoa ae raoiroi, ao ae i rou naba te buakaka. Ba I kimareirei n ana tua te Atua n aomatau ae i nanou: ma I nora te tua teuana i nanoni bwain rabatau, ba e buakana ana tua nanou, ao e tauai ba ana bwai ana tua te bure ae i nanoni bwain rabatau.”—I-Rom 7:18, 19, 21-23.
E kabwarabwaraki n ana taeka te abotoro Bauro ake a koreaki tao e kaania 2,000 te ririki n nako, bukini kangaangan karaoan ae raoiroi iroun te aomata ae aki kororaoi. Nimtan booto n reirei aika raraoi, riki i aani kataaki aika rangi ni kakaiaki, e kainnanoaki iai te nano ae korakora. Mangaia are, ti riai n titiraki ni kangai, Tera bukini karaoan ae raoiroi ae te kabanea ni kakawaki?
Iangoa ae taekinaki n te Baibara ibukin taai aika a na roko ni kaineti ma te aomata ae raoiroi man eti aroarona. Ti wareka ae kangai n Taian Areru 37:37, 38: “Tarataraa te aomata ae moan te raoiroi, ao nora te aomata ae e eti arona: Ba bon te rau tokin te aomata aei. A na bane ni kamaunaki taani bure: ao tokiia akana buakaka bon te koreaki nako.” Ti tuangaki ae kangai n Taeka N Rabakau 2:21, 22: “A na maekana aon te aba akana raoiroi, ao a na tiku i aona akana moa n raoiroi. Ma a na teweaki nako akana buakaka mai aon te aba, ao a na taekaki taani bure mai nanona.”
E ngae ngke ti kaungaki man berita aikai ao tabeua riki aika i nanon te Baibara, bwa ti na ukoukora maiura ae kakukureia te Atua, ma tiaki tii anne bukin karaoana iroura. E irekereke bukina anne ma te titiraki ae a bane n irekereke iai ana karikibwai te Atua aika wanawana. E na maroroakinaki n te kaongora ae imwina bwa tera te titiraki anne ao tera aron rotakira iai.