A na Abana te Aba Akana Nimamannei

“I iangoia ae e nang bitaki ao ni manga kaboouaki baika karikaki. . . . Tiaki ningabong n te moaningabong, ma n te tai ae raroanako mairoura ike a na reke iai karawa ao aonnaba aika boou.”​—Jean-Marie Pelt, ae te tia rabakau i aon te otabwanin i Buranti.

A mwaiti aomata aika rawawata nanoia ibukini kangaanga aika irekereke ma te otabwanin ao te natannaomata, aika rangi n tangira te aonnaba bwa e na onikaki nakon te baretaiti. Ma tiaki n ae e a tibwa miitaraeaki te kaantaninga aei n te ka-21 n tienture. E berita te Baibara rimoa bwa e na kaokaki te Baretaiti i aon te aonnaba. Ana taeka Iesu tabeua mai buakon kiibu aika a rangi n ataaki aika “akana nimamanei, . . . a na abana te aba,” ao “E na roko ueam. E na tauaki am taeka i aonaba, n ai aron tauana i karawa.” (Mataio 5:⁠5; 6:​10) Ma e ngae n anne, tii tabeman ni boong aikai aika a kakoauaa ae aomata aika nimamannei a na maeka n te baretaiti i aon te aonnaba ni kabutaa. Ma angiina aika a taku bwa Kristian ngaiia, a a kaakea iangoan te Baretaiti.

E kabwarabwaraa bukin katinanikuan te koaua ibukin te baretaiti i karawa ke i aon te aonnaba te aro ni Katorika, n te maekatin mai Buranti ae boretiaki ni katoa wiki ae La Vie ni kangai: “Imwin butanakon te reirei ibukin te baretaiti are i karawa ke i aon te aba i nanon 1,900 tabun te ririki, ao e a bua iai te iango i aon te baretaiti n ... aia kabwarabwara n Taabati nako, ao n aia reirei.” E taekinaki bwa e rabunaki mani “kamabubuaki” te taeka ae baretaiti n te “kakai ae kaminonano.” Minita tabeman a katinanikua te iango anne ibukina bwa “e kauekei iango aika mwaiti i aon te kakukurei i aon te aonnaba.”

N ana koaua Frédéric Lenoir, ae te tia rabakau i aoni waakin te Aro, “iangoan te baretaiti e kauekei banna aika akea manenaia.” N aron naba anne, e iangoia Jean Delumeau, ae te tia korea rongorongon rimoa ao n tia naba ni koroi booki tabeua i aon te iango aei, bwa kakoroani bukini berita aika n te Baibara bon taiani kaikonaki. E korea ae kangi: “Ni kaineti ma te titiraki ae ‘Tera ae riki nakon te iango ibukin te Baretaiti?’ a teimatoa Kristian ni kaekaa: E rabwa manga-utin te tia Kamaiu, bwa n te tai teuana ao ti na bane n taubai ao matara a na nora te kukurei.”

Te koaua bwa e manena naba ngkai rongorongon te baretaiti i aon te aonnaba? Tera raoi ae na riki nakon ara aonnaba nakon taai aika a na roko? E mabubu iangoan taai aika a na roko, ke e mataata raoi? A na kaekaaki titiraki aikai n te kaongora ae imwina.