Kaain te Rabwata N Tautaeka Aika Boou
NI Moaningabongin te Katenibong n Aokati 24 2005, e a kanakoaki te katanoata ae kaunganano rinanon te TV, nakoia kaain te utu ni Betaera ake n te United States ao Kanata. Ni moa man Tebetembwa 1 2005, iai uoman kaain Aia Rabwata n Tautaeka Ana Tia Kakoaua Iehova aika boou bwa, Geoffrey W. Jackson, ao Anthony Morris III.
E moana ana mwakuri ni bwaiania Brother Jackson ni Beberuare 1971 n abamwakoron Aotiteria teuana ae Tasmania. N Tun 1974, e a mare ma Jeanette (kauarerekean aran neiei bon Jenny). Imwin te tai ae aki maan, a uaia n mwiokoaki n te mwakuri n special pioneer. A mwakuri naakai bwa mitinare i Tuvalu, Taamoa, ao Biitii, aika aban te Betebeke Maiaki, man 1979 nakon 2003. Ni menaia n aaba aikai, e rangi ni korakora aia ibuobuoki naakai nakon rairan booki aika aanaki n te Baibara. Ni moan 1992, e a mwakuri Brother Jackson bwa kaain te Komete n Tararua n Aia Aobiti Ana Tia Kakoaua Iehova i Taamoa, ao man 1996, e a manga riki bwa kaain te Komete n Tararua i Biitii. N Eberi 2003, e a riki bwa kaain te utu ni Betaera ma Jenny n te United States ao a a moana aia mwakuri n te Aobiti ae Buoka te Raitaeka. E aki maan imwina, ao e a manga riki Brother Jackson bwa te tia ibuobuoki nakon Ana Komete te Rabwata n Tautaeka Ibukin te Reirei.
E moana karaoan te mwakuri ni bwaiania Brother Morris n 1971 n te United States. N Ritembwa n te ririki anne, ao e a mare ma Susan, ao a a uaia ni bwaiania n te maan ae e kaania aua te ririki, ni karokoa e a bungiaki aia moan nati te mwaane ae Jesse. Imwina riki, e a manga bungiaki aia kauoman n nati ae te mwaane naba ae Paul. E a manga kabwanina ana tai ni mwakuri Brother Morris n 1979 ike e a riki iai bwa te regular pioneer. E a manga raonna neiere buuna n te mwakuri aei ngke a a bane n reirei natiia. E mwakuri te utu aei n taabo ike e korakora iai kainnanoan te ibuobuoki n aonon te United States aika Rhode Island ao North Carolina. I North Carolina, e riki Brother Morris bwa te tia bonomwi ibukin te mataniwi ibukin te aono ae uarereke, ao natina a karaoa te mwakuri n regular pioneer. A kaai ni kaoaki bwa a na mwakuri n te aobiti n tararua ibukin te United States Jesse ao Paul ni koron 19 aia ririki. Ao e a moana iai ana mwakuri ni mwamwananga Brother Morris. Imwina, n 2002 e a kaoaki ma buuna ae Susan nakon te Betaera, ike a a moana iai mwiokoaia ae boou n Aokati 1. E mwakuri Brother Morris n te Aobiti Ibukin te Mwakuri i Patterson ao imwina e a manga riki bwa te tia ibuobuoki n Ana Komete te Rabwata n Tautaeka Ibukin te Mwakuri.
Irarikia naaka uoman aika boou aikai, aikai ngkanne kaain te Rabwata n Tautaeka, C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ao D. Sydlik. Boni Kristian aika kabiraki kaain te Rabwata n Tautaeka ni kabane.