Ko Kekeiaki Ribuakon Am Namakin?
N ANGIIN te tai i nanoni maiun Nei Lena ae tao ai 30 te ririki, ao e a tia ni kekeiaki ribuakon ana namakin aika bubuaka, are e iangoia iai bwa akea bonganana. E taku: “A rangi n urua arou, mwakuri n tangako ake a karaoaki nakoiu ngke I uarereke. I namakinna iai bwa ai bon akea bongau.” E uringa naba arona n rikirake Nei Simone ao e taku: “E ribu i nanou kakoauan ae ai bon akea bongau.” E a moanna n taabangaki ni boong aikai, korakoran te aki-kukurei man aeka n namakin aikai. E taku te botaki n ibuobuoki teuana rinanon te tareboon ibukia rooro-n-rikirake, bwa e kaania iteran mwaitiia taani kani buokaki ake a tareboon, ae a kaota “teimatoan akean bonganaia.”
A taku taokita tabeman bwa e riki namakinan te aki-tau ngkana a kakeaaki bongaia aomata irouia ake tabemwaang. E kona n rikirake te aeka n iango anne ngkana e aki toki n taetaeraaeaki te aomata, e kabuakakaki n te aro ae riao, ke e karaoaki ae aki-riai nakoina n te aro n iowawa. N aki ongea bukin karaoan te mwakuri anne, ma e kona n rangi ni kamamaara mwina ao n uruaki iai aron te aomata. Te kakaae i aon bwai-n-aoraki ae e a tibwa karaoaki, e kuneaki iai bwa aomata aika bubuaka aia namakin bon ibukiia, a kona n ae a bon aki onimakinia ao n aki onimakinia naba aomata, n te aro are a a kakeaa iai bongan te reitaki ae kaan ao taian iraorao. E taku te ribooti n te kakaae anne: “N aron iangoana, a ‘karikii’ aroaro ake a a manga bon rangi ni mamaakui.”
Aomata ake a namakina aron anne, a aki toki ni mwane n te bwai are e atongaki n te Baibara bwa aia “iango n raraoma.” (Taian Areru 94:19) A namakinna bwa a aki kona n raoiroi aroia. A waekoa ni bukinia i bon irouia n aki iango moa, ngkana iai te bwai ae kairua ae riki. E ngae ngke a kona ni kamoamoaki irouia aomata tabemwaang ibukin baike a karaoi, ma a kona n namakinna i nanoia bwa taani kewe ngaiia are a na ataaki n te tai ae waekoa ke imwina riki. Ibukina ngke a taku bwa a aki tau ni karekea te kukurei, a mwaiti i buakoia aika a a manga bon urui aroia n aroaroni maiuiia aika aki-raraoi, n te aro are ai akea iai korakoraia ni kaeti aroia. Nei Lena are e taekinaki mai imwaina, e a reke aorakina ae kakaiaki ae e aki rin kanana ibukina bwa e aki onimakinna i bon irouna. E taku: “I a namakinna bwa I a aki kona ni bita te bwai teuana.”
Ma te koaua bwa te koraki ake a kekeiaki ribuakon “iango n raraoma,” a na teimatoa n rotaki buaka iai ni kabanea aia bong ni maiu? E kona ni karaoaki te bwai teuana ni katokaki iai aeka n namakin aikai ke e aki? E kaotii booto-n-reirei te Baibara ao reirei aika manena, ake a a tia ni buokiia aomata aika mwaiti bwa a na tokanikai iai. Baikara booto-n-reirei aikai tabeua, ao a kanga te koraki ake a rotaki buaka ngkoa iai, ni karekea te kukurei ni maiuiia? E na kabwarabwaraki aei n te kaongora are imwina.