Ukeran te Raunnano

ALBERT bon te mwaane ae e kakukurei tekatekana ma buuna ao iai natina uoman aika tamaroa aroaroia. Ma e namakinna bwa iai riki te bwai ae e tuai n reke irouna. Ngke e a kangaanga irouna reken ana mwakuri ni kareketianti, ao e a moanna n tabeakina te waaki n tautaeka, ma n nano n te waaki ni komuniti. E a riki naba bwa kaain te bwaatei ni Komuniti.

N te tai ae aki-maan ao e a aikoa rauaki nanon Albert n te waaki ni Komuniti. E a motika roona man te waaki n tautaeka, ao e a kabanea angiin ana tai ma korakorana irouia kaain ana utu. Oin ana kaantaninga ni maiuna boni kakukureiaia ana utu. Ma e teimatoa naba n namakinna bwa iai te bwai ae e tuai n reke irouna; e bon tuai man reke irouna te raunnano ni koaua.

E a taabangaki aron te namakin are e reke iroun Albert. A a tia aomata aika mirion ma mirion mwaitiia aika kataia ni kamanena raoi maiuiia, ni katai koaua, rabakau mairouia aomata, ao Aaro aika kakaokoro nako. N aaba ake i Maeao ao aia waaki aomata aika aranaki bwa taian hippie n 1960 tabun, bon te karitei nakon aroaro-ni-maiu aika a tataneiai ni bwainaki irouia aomata. Rooro-n-rikirake a kakaaea riki te kakukurei ao manenan maiuiia rinanon taian drug ake a rota te iango, ao reirei aika oteaki irouia aomata aika aongkoa a riki bwa aia tia kairiri ni bwaai n taamnei. Ma aia waaki taian hippie e aki karekea te kakukurei ni koaua. Ma e kaungaia rooro-n-rikirake bwa a na riki n tautoronaki n taian drug, ma kamwaitakin raoia are a wene ni bure ma ngaiia, ao a uota rikaaki te aroaro ni maiu ae riai ni kamangaoa.

I nanon tienture aika bati, a mwaiti aika ukoukora te kakukurei rinanon te kaubwai, te mwaaka ni kairiri, ao te reirei ae bubura. A kairiri kawai aikai nakon te bwarannano. E taku Iesu: “Ba ngkana tao e bati ana kaubai te aomata, ao tiaki nanona ba e na teimatoa maiuna iai.” (Ruka 12:15, BK) Ma kakorakoran uaiakinan te kaubwai, e aki toki ni karekea te nanokawaki. E taku te Baibara: “Akana kani bwaibwai a baka n te kaririaki ma te ao-ni-katatai ma taiani kaibabaru aika bati aika nanobaba aika kamaraki, aika kaiinakoia aomata n te tiringaki ma te kamateaki. Ba wakaani baika bubuaka ni kabane tangiran te mane; ae a kani karekea tabemang, . . . ao a ewariia i bon i rouia ni maraki aika bati.”​—1 Timoteo 6:9, 10.

Ma e na kanga ngkanne te aomata ni karekea te raunnano ni koaua ao n ataa bonganan maiuna? E na karaoia rinanon te kakatai, kaanga n aron karenakoan te kainiwai n te tabo ae roo ni kamanennantia teken te taakete? E kakukurei bwa tiaki anne ae nanonaki iai. N aron ae ti na noria n te kaongora ae imwina, te kaeka nakon anne bon te bwai ae kainnanoaki ae kakawaki ao e okoro ibukia aomata.

[Taamnei n iteraniba 3]

E na buokiko ni karekea te raunnano ni koaua uaiakinan te kaubwai, te kairiri ao te reirei?