Te Kabuanibwai ae Kananokawaki ae Rina n Riki

E TABE n takaakaro n te roki n tebotebo Owen, ae te ataeinimwaane ae ai tibwa uoua ma te iterana ana ririki ni maiu. E tamwarakea te kabwate ni bwainnaoraki are a taku ana karo bwa e aki kona n roko iai. I nanon te kabwate anne ao iai te bwatoro teuana are e a atikaki matana iai. E kaukia ngkekei ao n nima kanoana, ao ikanne are e a riki iai te kabuanibwai.

Kanoan te bwatoro anne bon te acid ae korakora, ao te kananokawaki bwa e mate naba ngkekei Owen. A uruaki nanoia ana karo iai, ao tamana are Percy, e a kakaaea nako karauan nanona n ana Aro. E titiraki ni kangai: “Bukin tera bwa e riki aei?” E kaekaa mitinaren ana Aro ni kangai: “Te Atua e tangira riki temanna te anera ae te ataei i karawa.” E uruaki riki nanoia kaaro aika rawawata aikai, ao a namakinna bwa e aki riai karaoan anne iroun te Atua. Bon nanon te Atua bwa e na riki te aeka ni kabuanibwai anne? E minotaki ana iango iai Percy ao e a raure nako ma ana Aro.

E tabe n iango Percy i aon te bwai are e a tia n riki ao e taku: ‘E teimatoa naba ngkai natiu ni maraki? N na manga kaitiboo ma ngaia imwina?’

Ngkoe naba, tao ko a tia n iaiangoia bwa tera ae e riki nakoia maate, ao e na kona ni manga reke riki te kaitiboo ma ngaiia nakon taai aika a na roko ke e kanga. Ana Taeka te Atua ae te Baibara, e kaekai titiraki akanne. Iai i nanona kaeka aika mataata raoi ma ni karaunano nakoia ni kabane ake a karawawataki ibukin rikin aeka ni kabuanibwai aikai. Ma ae moamoa riki bwa e kaotaki iai te kaantaninga ae kakukurei are e a tia ni beritanna te Atua, ae taekan te manga-uti.

Taiaoka wareka te kaongora ae imwina, ni karekea riki reireiam ibukin te kaantaninga ae kamimi aei.