“Kam na Tataro ni Kangai”
KO ATA ana Tataro te Uea? Bon te tataro ni katoto are e a tia n reireinia aomata iai Iesu Kristo. E taekina ae kangai Iesu n ana Kabwarabwara i aon te Maunga ae tanoata taekana: “Ma ngaia ae kam na tataro ni kangai.” (Mataio 6:9) Kioina ngke bon Iesu ae e moan reiakina te tataro aei nakoia aomata, e aki toki ngkanne n atongaki bwa ana Tataro te Uea, ke Tamara are i Karawa.—Ae atongana n te taetae n Ratine, Paternoster.
A mwaiti aomata aika a a tia ni kamatenikuna ana Tataro te Uea, ao a kaokioka taekinana, tao ni katoa bong. N ririki aika tibwa nako, ao a mwaiti aika taekina te tataro aei n aron te kamatenano i nanon taabo n reirei ao n taian runga ni botaki ibukin te botannaomata. E aera ngkai e a rangi ni karineaki ana Tataro te Uea?
E korea ae kangai te tia rabakau i aon te Aro ae Cyprian n te katenua n tienture: “Tera riki te tataro n onimaki ni koaua nakon are e a tia n anganira Kristo . . . ? E ngaa te tataro nakon te Tama ae koaua riki nakon are e a tia n anganira Natina, are boni ngaia te Koaua?”—Ioane 14:6.
N ana reirei ni katekiti te Aro ni Katorika n Rom, ao e maroroakinaki iai bwa te tataro ae Tamara are i Karawa boni ngaia “aan te tataro ni Kristian.” E kaotaki n te World Book Encyclopedia bwa e rangi ni kakawaki te tataro aei irouia Aaro nako aika kaaini Kirititentom, ao a kabwarabwaraa iai bwa bon teuana mai buakon “reirei aika aana te onimaki ni Kristian.”
Ma e ngae n anne ao e riai n ataaki bwa aomata aika mwaiti ake a a tia ni kamatenikuna ana Tataro te Uea, a bon aki ataa raoi nanona. E taku te nuutibeeba ae te Canada’s Ottawa Citizen: “Ngkana iai irekerekem teutana ma te Aro ni Kristian, ko bae ngkanne ni wikoakoa n taekina ana Tataro te Uea n aki bono ikem, ma tao e kona ni kangaanga iroum bwa ko na manga wiremwe n taekinna ao n ota raoi n nanona.”
Te koaua bwa e bon rangi ni kakawaki bwa ti na ataia bwa tera ae ti tataroia nakon te Atua? E aera ngke e anganira ana Tataro te Uea, Iesu? Tera raoi nanona nakoim? Ti na kaatuui ngkai ara iango n titiraki aikai.